Ostegunean aukeratu zituzten pelotak gaur Buruz Buruzko finala jokatuko duten bi erremontistek: Urrizak eta San Miguelek.
Lehenengoa da faboritoa, aurreko bi urteetan ere irabazi egin baitu txapela. San Miguel ere, ordea, finalera iritsi zen lehengo urtean, eta aurten ez dio lana batere erraztuko orain arteko txapeldunari.
Gaur jokatuko da finaleko partidua Galarretan; bigarren partidua izango da 16:00etatik aurrera jokatuko diren lauen artean.
Sakean min egitea helburu
Pelota aukeratzea gehiago kosta zitzaion Urrizari. Azkenean, lehorrak aukeratu zituen.
San Miguelek, berriz, denbora gutxiago behar izan zuen. «Pelota biziagoak hartu ditut, sakean min emateko, eta peloteoa sahiestu ahal izateko».
Urrizaren estrategia beste bat izango da: «tantoak eta partidua luzatu». Era berean, bularreko lesio txiki hori guztiz gainditu duela dio, eta indartsu dagoela. San Miguel ere guztiz sendatuta dago, bronkitis bat izan ondoren, eta lasai, presiorik gabe sentitzen da.
Beste hiru partidu, egun berean
Finalaz gain, beste hiru partidu jokatuko dira gaur. Aurretik: Juanenea-Larrañaga/Matxin VI-Zubiri. Eta ondoren: Zeberio II-Ion/Uterga-Endika, eta Segurola-Agirrezabala/Ezkurra II-Aizpuru III.