Pozik eta ahalik eta zoriontsuen bizi behar dela diote Pirritx, Porrotx eta Marimotots pailazo ospetsuek. Hortik, saio berriari Bizipoza izena jarri izana. Musika Eskolak gonbidatu ditu Hernanira, ikasturte berriari hasiera ematera. Ikuskizuna bihar arratsaldean da, 18:00etan, eta ondo pasa nahi duten herritar guztiak daude gonbidatuta. Sarrerak aldez aurretik erosi behar dira Garin tabernan, 6,5 euroan. Leokadistin eta Ikusi Makusi jostailu dendan bukatu dira.
Talde eta elkarte ezberdinekin egiten dute lana pailazoek, eta Musika Eskolarekin azken sei urteetan ari dira lanean. Aurkezpenean esan zuten moduan: « Denok dugu zer eman eta zer jaso. Bizitza osoak izan behar du sare bat, jaso eta emateko, bizipoza lortzeko».