Denboraldia punttu-punttuan hasi nahi dute Hernaniko bi talde nagusiek. Uztailean hasi zituzten entrenamenduak, eta orain goi-mailako aurredenboraldia dute aurretik. Ohorezko mailako taldeak bigarren partidua du larunbatean; eta Emakumezkoen ligakoak, aurrenekoa. Goi-mailako bi partidu hauek Landaren izango dira.
Arerio indartsua, hasteko
Pauko RC Lonsen taldearen kontra neurtuko ditu indarrak Hernanik, debuteko partiduan. 16:30etan izango da neurketa, Landaren. Arerio indartsua izango du aurrez aurre; izan ere, RC Lonsen Frantziako Elite Top 10ean aritzen da; maila horretako txapelduna izan zen gainera, orain bi urte. Jokalari garrantzitsu asko dituen taldea da frantziarra, horien artean: Caroline Ladagnous atzelaria, Laetitia Grand hirugarren lerrokoa, eta Christelle Chobet eta Lise Arricastre harroinak.
Talde lapurtarra kontrario, Ohorezko Mailako taldeak
Ehuneko ehunean iritsi nahi du Santboianaren kontrako partidura Hernanik, eta bide horretan, dena ematera aterako dira larunbatean. Lapurdiko Boucau-Tarnos Stade izango dute aurrez aurre, maila berean aritzen den taldea, baina altuagotan ere aritu dena.
Aurredenboraldiak, segida
Hernaniko taldeek aurredenboraldiarekin segiko dute, datorren astean ere.
Emakumezkoen taldeak Valentzian jokatuko du, Tecnidexen kontra.
Gizonezkoetan, seniorretako bigarren taldeak triangularra jokatuko du Donostian, Aieten, Atletiko SS eta Santboinako bigarren taldearen kontra.