ikasturte berria hastear da, eta Musika Eskolak ospatu egin nahi du hori. Azken urteetako ohiturari heldu, eta Pirritx, Porrotx eta Marimototsen emanaldia antolatu dute. Bizipoza emanaldia eskainiko dute Atsegindegin, 18:00etan. Joan nahi duten guztiek salgai dituzte sarrerak herriko hiru puntutan: Leokadisti liburu dendan, Garin tabernan, eta Ikusi Makusi jostailu dendan. Prezioa, 6,5 euro.
«Denok dugu zer eman eta zer jaso»
Talde eta elkarte askorekin lana egindakoak dira Pirritx, Porrotx eta Marimotots, eta horietako bat da Hernaniko Musika Eskola. Bizipoza saioarekin izango dira igandean, Atsegindegin. Elkarlan izaera hori ondo biltzen duen saioa izango da, Porrotxek azaldu zuen moduan, denok baitugu zer eman eta zer jaso: «lan eta lan ari diren elkarte askorekin aritu gara. Askotan pentsatzen dugu zerbait ematera gatozela, baina konturatzen gara, jasotzen duguna beti dela gehiago. Denok dugu zer eman eta zer jaso. Bizitza osoak izan behar du sare bat, jaso eta emateko, bizipoza lortzeko».
Porrotx: «Musika arloan, Hernani beti izan da eta izango da erreferente bat. Horregatik da Hernani herri alaia eta irudimentsua.
Igandean ondo pasatzeko gogoa duten guztiei egin die deia, Porrotxek: «etorri eta gozatu, saiatuko gara biltzen garen guztiok disfrutatzen, ondo pasatzen»
Musika Eskolako akordeoi taldeak 10 urte
Maribel Insaustik, Musika Eskolako idazkariak ere, izan zituen hitzak atzokoan: «pozgarria da, seigarren urtez, zuen presentzia izatea. Udalari ere, eskertu nahi diogu urtero ematen duen laguntza».
Musika Eskolako akordeoi taldeko kideak ere, bertaratu ziren atzoko aurkezpenera. Insaustik azaldu zuenez, taldeak 10 urte beteko ditu aurten, eta badute asmoa, musikarekin zerbait egiteko.
Akordeoi taldeak eta Musika Eskolak orokorrean izan duen bilakaera goraipatu zuten aurkezpenaren bukaeran, Intxauspe alkateak eta Porrotxek berak. Alkateak esan zuen, elkarlanean, urteak direla kurtso hasierako ekitaldi hau antolatzen dutela: «fruituak ematen ari da, eta eskerrak ematekoa da. Herritarrak animatu nahi ditut igandeko ekitaldira». Porrotxek bestalde, Hernanik musikarekin duen erlazioa ekarri zuen gogora: «Musika arloan, Hernani beti izan da eta izango da erreferente. Horregatik da Hernani herri alaia eta irudimentsua».