Oporretatik festara, bide zuzena egingo dute Latsunbeberri-Marieluts auzoan. Eta indarrak berrituta bueltatu beharko dute, gainera! Izan ere, makina bat txapelketa dauzkate zain, festen hiru egunetan. Ostiralean hasita, ekintzaz ekintza ibiliko dira, gelditu gabe.
Txapelketa batekin abiatuko dira jaiak, hain justu: frontenis txapelketa jokatuko dute, auzoko frontoian. Ondoren, sardin jatea eta Martxel magoaren emanaldia izango dira, eta estreinako eguna bukatzeko, musika gauean: CD Montre eta Nima taldeak.
Txupinazoa, larunbatean
Ostiralean jarriko dira festa-giroan, baina larunbatean izango da txupinazoa, jaiei hasiera emateko. Eta hortik aurrera, bata bestearen atzetik etorriko dira ekintzak. Goizean bakarrik, jokoak, marrazki erakusketa, pelota partiduak eta trikitilari eta buruhaundiak egingo dira. Ondoren, paellada izango dute denek. Txartelak salgai daude, Latsunbe, Gailur eta Inaxi okindegietan.
Txapelketen arratsaldea izango da larunbatekoa: musa, ping-pong eta toka jokatuko dira. Haurrek, intxableak eta kamalastikak edukiko dituzte, ondo pasatzeko, eta ondoren txokolatada.
Gauean, zezensuzkoa aterako da, auzotarrak korrika jartzera, eta disko jartzaileek markatutako erritmora bukatuko dute eguna.
Tortillak eta sagardoa, azken eguneko menua
Patata tortilla lehiaketa izango da zita nagusia, igandean. 11:00etatik 12:00etara entregatu beharko dituzte, eta orduan baloratuko dituzte epaileek. Bitartean, pelotako finalak jokatuko dira, eta gozogintza tailerra ere egingo da. Eguerdi partean, sagardo probaketa egingo da. Hamar sagardotegiren sagardoa dastatzeko aukera izango dute bisitariek.
Bazkalordua iristean, beste kohete bat botako dute, baina oraingoan, festen bukaera da iragarriko dutena.
Egunero, edariak, ogitartekoak eta pintxoak egongo dira txosnan, festen antolakuntza diruz laguntzeko.
EGITARAUA
Irailak 5, ostirala
17:30 Frontenis txapelketa, auzoko frontoian. Izenematea zabalik, Auzo Elkarteko buzoian parte hartzailearen datuak utziz.
20:30 Sardin jatea pista polibalentean.
21:30-22:30 Martxel magoa.
22:30-02:00 Musika, pista polibalentean: CD Montre eta Nima.
Irailak 6, larunbata
10:00 Auzoko festen hasierako kohetea.
10:00-12:00 Betiko jokoak: zaku lasterketa, altxorraren bila, zinta lasterketa (bizikletan), zapi jokoa eta futbolina.
10:30 Marrazki entrega eta erakusketa, pista polibalentean (saria izango da parte hartzen duten guztientzat).
10:30 Esku pelota, II. Iturritxo Elkartea txapelketa.
12:00 Trikitilari eta buruhaundiak auzoan barrena.
13:00 Sari banaketa, pistako oholtzan.
14:00 Paellada gazte eta helduentzat, pistan. Txartelak salgai daude, Latsunbe, Gailur eta Inaxi okindegietan.
16:30-19:30 Intxableak eta kamalastikak, pistan.
17:30 Mus txapelketa pistan. Apuntatzeko: txosnan, ostiralean eta larunbatean.
17:30 Ping-pong txapelketa auzoko tenis pistan. Izenematea zabalik, Auzo Elkarteko buzoian datuak utziz.
19:00 Toka txapelketa pistan polibalentean.
19:30 Txokolatada, pistan.
20:00-02:00 Musika Atarrabiyoko oholtzan: Txingudi Deejays.
00:00 Zezensuzkoa.
00:05 Fagollaga jatetxean bi afariren zozketa, saldutako boletoekin.
Irailak 7, igandea
11:00-12:00 Patata tortilla lehiaketa (entrega pistako txosnan).
Sariak:
- -2 afari latsunbe tabernan.
- -2 afari Tranbia tabernan.
- -2 afari Ilargi tabernan.
11:00 II. Iturritxo Elkartea pelota txapelketako finalak.
11:00-13:00 Gozogintza tailerra, Iturritxo elkartean (8 urtetik gorako haurrentzat). Izenematea zabalik, Auzo Elkarteko buzoian parte hartzailearen datuak utziz.
12:00-12:30 Txapelketara aurkeztu diren tortillen epaiketa eta sari banaketa.
12:00-13:00 Trikitixa.
12:30-13:30 Sagardo dastaketa pistan: Altzueta, Artola, Rufino, Akarregi, Alberro, Elorrabi, Otsuenea, Gurutzeta, Laburu eta Zelaia.
14:00 Festa bukaerako kohetea.
*Oharra: egun hauetan zehar edariak, bokadilloak eta pintxoak erosteko aukera izango da txosnan, laguntza ekonomikoa emateko aurtengo eta datozen urteetako festen antolakuntzarako.