Sareak ehunduz erakusketa egongo da ikusgai Biteri kultur etxean, aste honetan zehar, irailaren 1etik 7ra. Erakusketak islatu nahi du, Palestinako lurralde okupatuan bizi duten egoera: «emakume palestinarrak, Israelen okupazioaren ondorio politikoak jasateaz gain, haien eskubideak mugatzen dituen gizarte patriarkal batean bizi dira».
Erakusketaren oinarrian, Euskal Herriko emakumeen elkarteetako 10 ordezkarik, Palestinara egindako bidaia dago. UNRWA Euskadi elkarteak antolatu zuen bidaia, Jabekuntzaren erretratuak proiektuaren barruan.
Bertako eta Palestinako emakumeen arteko sarea
Proiektuaren helburua, hain justu, sareak ehuntzea da, bertako emakume elkarteen eta Palestinakoen arteko harremana sustatzea.
2013ko ekainean egin zuten bidaia 10 ordezkariek, Palestinara. Astebete eman zuten bertan, eta hango emakume elkarte zenbaitekin bildu ziren, Gazan eta Zisjordanian.
Biterin jarriko duten erakusketa, emakume talde horren lan kolektiboa da. Palestinako bidaian bizitakoa, ikuspegi propio batetik islatzen dute.