Bukatzen ari da traineru denboraldia, baina oso goiz da oraindik, balorazioak egiteko. Goizegi, zitarik inportanteena jokatzeko baitago: Kontxako bandera. Datorren ostegunean egingo da sailkapen estropada, eta bertan izango dira Amets Zapiain astigartarra eta Amaia Zuaznabar hernaniarra. San Juanekin bata eta Oriorekin bestea, ilusio berbera dute: Kontxako estropadan egotea.
«Kontxa irabaztea oso haundia dela esaten dute, baina sartze hutsa ikaragarria izango litzateke», kontatzen du Zuaznabarrek. Esperientzia eder hori ezaguna du Zapiainek, honezkero: «sailkapen estropadan lehiatu nintzen iaz, eta negarrez bukatu nuen, sartzea lortu genuelako».
Bide ezberdinak, eta helburu ezberdinak
Kontxara iristeko, oso bide ezberdinak egin dituzte Zapiainek eta Zuaznabarrek. San Juanen, dena irabazi dute aurten: Euskotren Liga, Gipuzkoakoa, Euskadiko eta Gipuzkoako txapelketak, eta bandera mordoa. «Ezin dugu gehiago eskatu, oraindik sinetsi ezinda gabiltza», dio Zapiainek. Kontxa irabaztea, «denboraldi ikaragarria borobiltzea» izango litzateke, beraientzat. Orion, berriz, «pattal» hasi zuten sasoia, Euskotren Ligatik kanpo geratuta: «Gipuzkoako txapelketan kolpea hartu ondoren, txipa aldatu genuen, ez zegoen horrela jarraitzerik, eta ordutik gorantza egin dugu», azaldu du Zuaznabarrek. Horregatik, Kontxarako sailkatzea da traineru horiaren «helburu nagusia, eta hortik aurrera datorrena, ederki».
«Titularrak egon arren, denoi ematen zaigu aukera»
Pertsonalki egindako sasoiarekin, pozik dira Zapiain eta Zuaznabar: «badaude titular batzuk taldean, gehien lehiatzen direnak, baina denoi ematen zaigu aukera». Hernaniarrak, gainera, estreinako denboraldia zuen, traineruetan, eta «oso gustora» aritu da: «honetan jarraituko dut, seguru baietz».
Denboraldi guztian bezala, Kontxan ere lehiatzeko aukera izatea espero dute: «sailkatuz gero, pentsatzen dugu denoi emango digula aukera, Kontxan aritzeko; berezia da».
Hernaniko harrobitik, estropada nagusira
Hernanin hasi ziren arraunean biak, batel eta trainerilletan: «hasi ginenean, oso jende gutxi ginen, eta pixkanaka sendotzen ari da taldea». Hernanin jarraitzen du Zuaznabarrek, eta aurten utzi du Zapiainek, San Juanekin entrenatzeko, traineru denboraldiari begira.
Hernanin ez ziren elkarrekin lehiatu, adin tarteagatik: 19 urte ditu Zapiainek, 16 Zuaznabarrek. Orain bai, txanda berean dabiltza, baina aurkari bezala: «uniformea janzten dugunean, pike pixka bat badago, baina uretatik kanpo lagunak gara».