«Datorren urteko urrian, 50 urte egingo ditu Hernanik. Eta zer hobeto torneo bat jokatzea baino, taldearen historian hain garrantzitsua izan den jokalari baten omenez, urteurreneko ospakizunak hasteko». Iñaki Quesadaren Oroimenezko txapelketa aurkeztu zuten Hernani, Atletico San Sebastian eta Zarautz taldeetako ordezkariek, asteartean. Bihar jokatuko da torneoaren aurreneko edizioa, Landaren.
Lau talde ariko dira txapelketan: hiru antolatzaileak, Atletico San Sebastian, Zarautz eta Hernani; eta gonbidatu bat, US Nafarroa, Baigorri eta Donibane Garaziren fusiotik sortua.
Horrela, bi partidu jokatuko dira: 16:00etan, Zarautz/Atletico San Sebastian; eta 18:00etan, Hernani/US Nafarroa. Pretenporadan daudenez, eta prestaketa bezala ere balioko duenez, nahiago izan dute «antzeko maila duten taldeak elkarren kontra aritzea».
«Arrasto haundia utzi zuen jokalaria»
Maiatzean zendu zen Iñaki Quesada. Atleticon, Hernanin eta Zarautzen jokatu zuen, eta «arrasto haundia» utzi zuen hiruretan: «lan haundia egin zuela ez dago zalantzarik, eta hori ezin dugu ahazten utzi». Horregatik, berari omenaldia egitea erabaki dute, hiru taldeek elkarlanean.
Landaren jokatuko da aurreneko edizioa, eta txandatuz joango dira, urtez urte: datorren urtean Zarautzen, bi urte barru Donostian... Izan ere, asmoa da «torneoa betirako geratzea».
«Ez dago zalantzarik, Iñaki Quesadak lan haundia egin zuela errugbiaren mesedetan, eta lan hori guztia ezin dugu ahazten utzi».
«Sinbolikoki, 50garren urteurrenaren kohetea»
Taldearen 50garren urteurreneko ospakizunetan murgilduko da Hernani, eta nahi izan dute Iñaki Quesadaren omenaldia izatea aurreneko ekintza: «gure historiaren elementu garrantzitsu bat da Iñaki, eta sinbolikoki, 50garren urteurrenaren kohetea izango da».
Urtean zehar, beste ekintza asko ere egingo dituzte, urteurrena ospatzeko: bisitak, konferentziak, jokoak, argazki erakusketak...
Bihar, partiduak hasi aurretik, lore sorta eskainiko diote familiari, eta Quesadari buruzko istorioak eta anekdotak kontatuko dituzte.
Txapelketak ere izango du hirugarren denbora: afari herrikoia. Atsegindegin egingo dute, 20:30etan. Txartelak 10 euroan salduko dira, torneoan.
Hirugarren denbora: afaria
Txapelketak ere izango du hirugarren denbora: afari herrikoia. Atsegindegin egingo dute, 20:30etan. Nahi duten guztiek izango dute aukera, errugbi-giroan afaltzeko.
Jan-edan aukera zabala izango da, eta txartelak torneoan bertan egongo dira salgai, 10 euroan.