Indar eta burrunba haundiarekin hasi ziren atzo San Joan Txiki edo Portu auzoko festak. Ohi bezala, aurten ere etxeferoen etengabeko soinuak argi utzi du festarako tartea hasi dela.
Atzo eguerdiko 12:00etan bota zen etxeferoa, hain zuzen, baina gaztetxoenak hasiak ziren ordurako festaz gozatzen. Izan ere, marrazki eta pintura lehiaketa izan zen goizean, eta bestalde, haurren parkina: puzgarriak, ohe elastikoak, olla...
Arratsaldean ere haurrek izan zuten protagonismoa, jolasetan, eta gaur goizean berriro izango dute aukera jolas horiek probatzeko.
Bestalde, gusto eta adin guztietarako ekitaldiak izango dira festa hauetan ere.
Tripa betezea gustoko
Nori ez zaio gustatzen tripa betetzeko aukera izatea? Portu auzoan ez da kuidadorik gosea pasatzeko.
Atzo bertan, haurrek txokolatada izan zuten, egun osoko jolasetan galdutako indarrak berreskuratzeko. Bestalde, 24garren sardin-jatea ere atzo egin zen, eta beste urte batez lepo bete zen Portu auzoa, parrilatik iristen zen usain goxoari segika.
Eta oraindik ere izango da aukera jaki eta edari goxoez gozatzeko. Izan ere, gaur goizeko 08:30etan baratxuri zopa banatuko da esna agoantatu duten gautxorientzat eta goiz jaiki diren goiztiarrentzat.
Bihar, berriz, urteroko sagardo lehiaketa egingo da eguerdiko 12:30etan. Altzueta, Oialume-Zar, Olaizola, Eula, Akarregi, Alberro, Elorrabi, Iparragirre, Artola, Itsasburu, Otsua-Enea eta Rufinoko zukuak probatu ahal izango dira. Guztia, beti bezala, Itxaso, Maialen eta Uxue trikitilariek girotua. Eta ondoren, bazkaria izango da.
Tripa betetzeko aukerarik ez da
faltako aurten ere: goizean baratxuri zopa banatuko da eta bihar sagardo lehiaketa eta
bazkaria izango dira.
Tripa betetzeko aukerarik ez da faltako aurten ere: goizean baratxuri zopa banatuko da eta bihar sagardo lehiaketa eta bazkaria izango dira.
Musika, etengabean
Portuko jaietako beste bereizgarrietako bat burrunba izaten da. Batetik, etengabe botatzen diren etxeferoena. Eta bestetik, txoko guztietara iristen den musikarena.
Atzo gauen bertan kontzertu ikaragarriak izan ziren: Broken, The Zepo eta BH Roja aritu ziren gaua girotzen.
Gaur, berriz, Kalez Kale Kantarikoekin euskal kantaldi herrikoia egingo da gaueko 24:00etan hasita. Lehengo urtean arrakasta izan zuen ekimen berri honek, eta aurten errepikatzea erabaki da. Hau bukatuta, Laiotz taldea ariko da dantzarako musika jotzen, gorputzak agoantatzen duen arte.
Bihar goizean, txistularien dianak jarriko du musika goizeko 09:30etan. Gero, 12:00etan Hernaniko Bertso Eskolako bertsolariak ariko dira kantari. Arratsaldeko 18:00etan, berriz, Ainara eta Shala dantza taldeek jarriko dute musika eta erritmoa; batuka, funky eta sabel-dantza erakustaldia eskainiko baitute. Eta gauean, festak bukatzeko, Laiotz taldearekin dantzaldia izango da berriro. Tartean, zezensuzkoa aterako da dantzara, edo ingurukoak dantzan jartzera, eta azken traka zaratatsuarekin bukatuko dira aurtengo San Joan txikaik.
Lehengo urteko bi ekitaldi berriek arrakasta izan zutenez, mantendu egin dira aurten: kantaldia Kalez Kale Kantarirekin eta zaldi-dema, errebantxarekin.
Paollaren zaldiak errebantxa, Azkonobietarenari
Aurten mantendu den beste ekitaldi berrietako bat zaldi-demarena izan da. Lehengo urtean egin zen lehenengo aldiz, eta aurten errebantxa eskatu dio galtzaileak irabazleari.
Horrela, Hernaniko Paollaren zaldia irabazten saiatuko da aurten, Urnietako Azkonobietaren zaldiak baino plaza gehiago eginez. Bihar izango da, arratsaldeko 19:00etan.
Bestelako txapelketa eta partiduek ere kabida dute noski, aurten. Pelota partidua jokatuko da bihar: Ander Leiza eta Unax huizi ariko dira Xabier Apaolaza eta Oinatz Insaustiren aurka. Era berean, tiro karabina eta mus txapelketa jokatuko dira gaur, eta bihar, toka eta bote txapelketa.
Antolatzaileek diote: «denek gozatzeko moduko festak dira, eta gustatzen dena mantendu egiten dugu. Etorri eta ondo pasa!».
EGITARAUA
GAUR
8:00 Egunsentia, suzirien jaurtiketarekin.
08:30 Baratxuri zopa goiztiarrentzat.
11:30 Haur jolasak: zaku karrerak, aulki jokoa, lokotxak, ura eta irinaren jolasa, etab.
13:00 Zinta lasterketa izugarrizko opariekin.
Jarraian, Tiro karabina txapelketa.
16:00 Mus txapelketa Pedro Mari tabernan.
Ordu berean, Esku lanak.
18:00 LXIII. Asto lasterketa.
19:00 Patxin eta Potxin pailazoen ikuskizuna.
Jarraian, Denak afaltzera, gauerako indarrak hartzeko.
24:00 Kalez kale kantarikoekin Euskal Kantaldi herrikoia.
Ondoren, Dantzaldia Laiotzekin.
BIHAR
08:00 Egunsentia, suzirien jaurtiketarekin.
09:30 Diana txistulariekin.
11:00 Pelota partiduak: Ander Leiza -Unax Huizi bikotea, Xabier Apaolaza-Oinatz Insausti bikotearen kontra.
12:00 Meza auzoko hildakoen alde.
12:00 Hernaniko Bertso Eskolako bertsolarien saioa.
12:30 Sagardo lehiaketa. Itxaso, Maialen eta Uxue trikitilariek alaituta. Sagardotegi partehartzaileak: Altzueta, Oialume-Zar, Olaizola, Eula, Akarregi, Alberro, Elorrabi, Iparragirre, Artola, Itxasburu, Otsua-Enea eta Rufino.
13:00 XL. Toka eta Bote txapelketa.
14:30 Bazkaria.
18:00 Ainara dantza eskola eta Shala Dantza Taldearen eskutik Batuka, Funky eta Danza del vientre.
19:00 Zaldi dema. Errebantxa! Hernaniko Imanol Paollaren zaldia, eta Urnietako Azkonobieta baserriko zaldiaren kontra, 800 kiloko harriarekin.
Jarraian, Laiotz taldearen dantzaldia.
00:00 Jaien amaiera Laiotz taldearekin. Zezensuzkoa. Traka.