Udako oporrak bukatzeko gero eta gutxiago falta den arren, gertu dira Portuko festak, beti bezala, azken jai egunei umorea eta giro ona jartzeko.
Ostiralean hasiko dira San Joan Txiki festak, eguerdiko 12:00etan botako den txupinazoarekin, eta igandean bukatu, zezensuzko eta trakarekin.
Haurrentzako txokoa
Aurten ere haurrei zuzendutako ekintzak prestatu dira. Ostiralean bertan, txupinazoaren aurretik marrazki eta pintura lehiaketa egingo dira. Bestalde, umeek aukera izango dute jolasteko haurren parking-ean, eta arratsaldean haur jolasak egingo dira: zaku-karrera, aulki-jokoa, lokotxak... Indarrak berreskuratzeko, berriz, txokolatada izango dute.
Larunbatean berriro ere haur jolasak izango dira goizean, eta arratsaldean, zinta karrera eta pailazoak.
Zaldi-deman errebantxa izango da: Paollaren zaldiak Urnietako Azkonobietarena gainditu dezakeela demostratu nahi du.
Lorontzi lehiaketa, asto karrera, sardin-jatea eta sagardo-dastaketa ezin falta
Urtero ikusmin haundia sortzen duten ekintzak ere ez dira faltako aurten. Ostiralean XXIV. Sardin Jatea egingo da 20:30etan, eta aurretik, auzoko lorontzi ederrena nork duen jakingo da. Larunbatean, tiro karabina eta mus txapelketa izango dira; azken hau, Pedro Mari tabernan. Eta nola ez, asto karrera ospetsua ere egingo da arratsaldeko 18:00etan. Aurtengoa 63garrena izango da, eta baliteke beteranoenek gazteenei tokia egitea. Bestalde, igandean, izango dira pelota partidua, meza, bertsolariak, toka eta bote txapelketa, bazkaria, eta nola ez, sagardo lehiaketa, betiko moduan trikitilariek alaituta. Gainontzean, gauero izango da musika: Kalez Kale Kantari, Laiotz, BH Roja, The Zepo...
Paolla, errebantxa bila
Lehengo urtean antolatu zen lehenengo aldiz zaldi-dema Portun, eta Urnietako Azkonobietaren zaldia izan zen garaile, orduan. Aurtengoan, Paollak errebantxa bota dio. Igandean, 19:00etan.