Indarrak berrituta, eta Ohorezko Mailan jarraitzeak ematen duen pozarekin, denboraldi berria prestatzen dabiltza Hernani errugbi taldean. Helburua, aurten ere, «salbatzea» izango da, eta horretarako, sasoia «ondo hasi» behar dutela azpimarratu dute taldeko entrenatzaileek: Patrick Polidorik, Jon Insaustik eta Jon Iraolak.
Abuztuaren 1ean hasi zuen pretenporada Hernanik. Astean lau saio egiten dituzte: hiru zelaian, eta bat gimnasioan. Momentuz, «teknika indibiduala» lantzen ari dira: «jokalari bakoitzaren lanean zentratuta gaude, eta pixkanaka sartuko dugu taldeko jokoa», azaldu dute entrenatzaileek. Gainera, oraindik jendea falta da, taldearekin elkartzeko.
«Prestaketa, linea berean»
Aurreko urteetan bezela ari dira lanean, sasoi berrirako. «Apuratuta gaude, beti bezala», diote brometan. Bide beretik eramango dute prestaketa, ahalik eta ondoen iristeko, Ligaren hasierara.
Irailaren 14an jokatuko du aurreneko partidua Hernanik, Santboianaren kontra, Landaren: «partidu gogorra izango da, saiatuko dira kontaktua bilatzen, eta guri ez uzten korrika egiten». Oso inportantea da sasoia ondo hastea: «garrantzitsua da animoarentzat, gogoz entrenatzen jarraitzeko».
Gainera, Landaren izango da estreinakoa, eta «etxeko partiduak aurrera ateratzea» klabea izango dela uste dute.
«Guk ezin dugu pentsatu talde haundienek bezela; gure onena eman behar dugu, hasiera hasieratik»
«Gure onena eman behar dugu, hasiera-hasieratik»
Aurreneko partidura, ahalik eta ondoen iritsi nahi dute: «guk ezin dugu pentsatu talde haundienek bezala, lasaiago hasi eta pixkanaka sasoi-puntua hartzea; gure onena eman behar dugu hasiera-hasieratik».
Beste behin, Ohorezko Mailan mantentzea izango du helburu Hernanik: «salbatzea da helburua, momentuz; aurrerago, ikusiko dugu». Horretarako, «aukerak oso ondo aprobetxatu» beharko dituzte. «Eta ea lesioek errespetatzen gaituzten».
«Indargunea, talde-lana»
Taldea da Hernaniren puntu fuertea: «lanean ari gara talde-lana izateko indargunea, bajak ez nabaritzeko; ez dadila notatu nor ari den jokatzen».
Ahulgunea, berriz, alderdi fisikoa izango da, beste taldeek baino «kilo eta zentimetro» gutxiago baitu Hernanik: «korrika egitea eta dinamikoago jolastea da erremedioa, enfrentamendua saihestea».
Bajak, «oso garrantzitsuak»
Beste oztopo bati ere, egin beharko dio aurre taldeak. Sei jokalari galdu ditu, «guztiak oso garrantzitsuak»: Jokin Esnal, Ekhi Aranburu, Jon Olano, Tony Jones, Patxi Barandiaran eta Mathieu Berrouet. «Gehien nabarituko direnak hiru laurdenekoak dira, jende gutxiago dugulako hor». Linea horretan, hiru dira bajak: Esnal, Olano eta Jones. Lanagatik utzi dute gehienek; Tony Jones, berriz, Inglaterrara itzuli da, praktikak bukatuta.
Abonoak egiteko epea gaur irekiko da: Landareko bulegoan, astelehen-ostegun, 18:00etatik 20:00etara.
Puntuan jartzeko, hiru proba
Ligara sasoi onenean iristeko, hiru partidu jokatuko ditu Hernanik, pretenporadan. Aurrenekoa da, Zarautzekin egingo duten entrenamendu bateratua. Abuztuaren 23an izango da, Zarautzen. Egun horretan, Biarritzen aurka jokatzekoa zen Hernani, baina azkenean huts egin du, talde lapurtarrak. Astebete beranduago, abuztuaren 30ean, Nafarroaren kontra ariko dira, Landaren.
Azkeneko proba, Liga hasi baino astebete lehenago dute. Lapurdiko Boucau taldearen kontra jokatuko dute Landaren, irailaren 6an.
Abonoak egiteko epea zabalik, gaurtik aurrera
Gaur irekiko da abono eta laguntzaile txartelak egiteko epea, 2014-2015 denboraldirako. Landareko bulegoan egongo dira izena emateko orriak: astelehenetik ostegunera, 18:00-20:00.
Abonatu izateko, 50 eurokoa da kuota, eta partidu guztietarako izango dute sarrera. Laguntzaileek, berriz, 30 euro ordaindu beharko dute, txartela eskuratzeko. «Espero dugu jendea zelaira etortzea, laguntza haundia direlako, batez ere gaizki gaudenean», diote entrenatzaileek.