San Roke ermita txiki geratuko da Aranon, larunbatean. Santuaren eguna ospatuko dute, eta jendetza bilduko da bertan, beste behin.
Txistulariek emanen diote hasiera egunari. Herriko Plazan elkartuko dira, leku askotatik etorrita: Hernani, Bartzelona, Iruña, Lekeitio, Elorrio... eta Aranokoak ere bai, noski.
Ondoren, kanpai jotze saio bat eskainiko du Antonio Ezeizak, San Martin parrokian. Eta segidan, San Roke ermitara abiatuko dira, txistulariek markatutako erritmora. Bertan, meza eginen dute 11:00etan, Esteban Irurzun parrokoaren eskutik.
Kalejira eta herri bazkaria
Eguerdia iristen denean, kalejiran abiatuko dira, herriko kaleetan barrena, txistularien laguntzaz. Bazkaria izanen dute zain, Kontzejun. Bertan bazkaldu nahi duenak, bihar arte dauka izena emateko aukera, Kontzejura joanda edo telefonoz deituta: 948 51 42 79.
Bapo bazkalduta, eta arratsaldean bete-betean sartuta, egun ederrari agur esateko ordua iritsiko da: Agur Jaunak kantatuz despedituko dira.
EGITARAUA
10:15 Txistularien elkartzea, Herriko Plazan
10:30 Kanpai jotze saioa, Antonio Ezeizarekin, San Martin parrokiatik
10:40 Txistularien irteera San Roke ermitara
11:00 Meza, San Roke ermitan
13:30 Kalejira txistulariekin
14:30 Herri bazkaria Kontzejun
19:00 Festei agurra, Agur Jaunak kantatuz