Horma haundiegia izan zen Uterga atzo, Endika Barrenetxearentzat. «Oso partidu ona egin du, asko asmatu du», kontatu zion hernaniarrak Kronikari, partidua amaitu berritan. 20-30 galdu zuen, final zortzirenetan, eta Buruz Buruko Txapelketa hortxe amaitu da beretzat. Baina pozik dago, egin duen lanarekin: «pauso bat gehiago eman dut txapelketa honetan, eta ea datorren urtean beste bat egiten dudan».
Zaila espero zuen partidua, eta zaila izan zen. Parekatuta hasi ziren, eta Utergak aurreneko aldea hartu bazuen ere, berehala irauli zuen markagailua Barrenetxeak: 4-7 galtzetik, 11-8 irabaztera pasa zen. «Hasieran eroso sentitu naiz, eta asmatu dut. Berari kontrakoa pasa zaio; aurreneko partidua zuen buruz buru, eta kosta egin zaio sartzea».
«Gero eta hobeto aritu da»
Momentu txarrari berehala eman zion buelta, Utergak. «Gora egin du partiduan zehar, gero eta hobeto aritu da», zioen Barrenetxeak. Eta eroso sentitu zenean, partidua hautsi zuen doneztebarrak: 13-13 berdindu, eta 19-13 jarri zen, zuzenean. «Momentu horretan, tanto asko egin dizkit sakez, eta nik ere hutsak egin ditut».
Atzetik egonda ere, saiatzen jarraitu zuen Barrenetxeak: «kontzentratuta egon naiz, partidu osoan». Baina asmatzen jarraitu zuen Utergak, eta une batean, «partidutik atera» ere egin zen pixka bat, hernaniarra: «momentu batzuetan, ez dut garbi pentsatu, zer joko egin behar nuen».
«Ohiko jokutik atera naiz, bera nahastu nahian»
Ezer galtzeko ez, eta jokoa aldatzen hasi zen Barrenetxea: «bera nahastu nahian, ohiko jokutik atera naiz: sakeei atzetik erantzun, zabalera sakatu...». Trikimailuak ondo atera zitzaizkion, eta moztu zituen Utergaren takadak, baina orduan, bi falta egin zituen sakatzen: «ez dut asmatu pelota aldatzen; pisutsuegia zen».
Azkenean, ezinezkoa izan zen gerturatzea, eta tartea mantendu egin zuen Utergak, partidu bukaerara arte. Baikor begiratzen zion markagailuari, Barrenetxeak: «Uterga dagoen moduan, 20 tanto egitea ez da gutxi; ea datorren urtean 5 gehiago diren, eta hurrengoan irabazteko moduan nagoen».
«Defentsan hobetu dut, eta horrek puntuak eman dizkit»
Jokuz, ondo ikusi da hernaniarra, txapelketa honetan: «defentsan hobetu dut, eta horrek puntu asko eman dizkit». Hala ere, «oraindik hobetzeko asko» falta zaiola uste du.
Txapelketako final laurdenak, harmailetatik ikusi beharko ditu: Etxeberria IV eta Endika ariko dira bihar, aurrenekoan; eta Uterga eta Ezkurra, osatzen bada, datorren ostegunean. Semifinaletan, San Miguel eta Urriza dituzte zain.
Beste hiru partidu, atzo
Buruz burukoaz aparte, beste hiru partidu gehiago izan ziren atzo: Matxin IV-Larrañaga 33/
Ezkurra II-Labaka 35; Urriza-Ion 18/Zeberio II-San Miguel 26 (suspendituta); Matxin III-Aizpuru III 40/Etxabe II-Zubiri 35.