Momentu haundiak izan ditu denboraldiak: Ioritz Arrieta Europako txapeldun, Iñaki Esnali omenaldia, denboraldi amaierako afaria... Emaitzak ere bikainak izan dira: 15 txapela jantzi dituzte, eta 32 final jokatu, torneo ofizialetan zein pribatuetan.
Buruntzaldeako Txapelketarekin itxi zuten denboraldia. Hernanin jokatu ziren finalak, eta egunak bazuen beste berezitasunik: Iñaki Esnal omendu zuten, bere ibilbideagatik. Azkeneko partidua zuen, eta despedida beroa egin zioten. Ondoren, elkarrekin afaldu zuten, denboraldiari agur esateko.
9 pelotari, txapela jantzita
Hernaniko 35 pelotari federatuek 1.241 partidu jokatu dituzte denboraldi bakarrean. Horien artean, bederatzi izan dira txapela jantzi dutenak. Bereziki haundia izan da Ioritz Arrietaren sasoia: Europako txapeldun izan da, Espainiako azpitxapeldun, eta beste lau torneo pribatu irabazi ditu.
Paul Ojuel eta Eneko Aizpitarte, bere aldetik, Gipuzkoako txapelketan nagusitu dira. Ojuelek gainera, beste bi torneo pribatutan jantzi du txapela, eta Aizpitartek batean. Udaberri torneoan ere, Hernaniko pelotariak izan dira nagusi: Ekaitz Cisneros eta Suharri Rodriguez. Cisnerosek beste txapela bat ere jantzi du, denboraldi honetan.
Eta palmaresa borobiltzeko, torneo pribatuak irabazi dituzte beste lau pelotari hernaniarrek: Josu Altunak bi, eta Iñigo Urkizuk, Xabier Salaberriak eta Oihan Zugastik, bana.
Bi final dituzte gaur: Ojuel eta Arrieta, elkarren kontra Burladako torneoan; eta Esnal-Aizpitarte, Usurbligo bikotearen aurka, Zarautzen.
Batzuk oporretan, eta besteak berriro lehian
Herriko pelotari gehienek merezitako oporrak hartu dituzte, indarrak berritzeko. Beste batzuek, aldiz, lehian jarraitzen dute, udako txapelketak eta festetako partiduak jokatzen.
Aurreko denboraldia bikaina izan bazen, are bikainagoa izan da hurrengoaren hasiera: Oiartzungo San Esteban jaietan, finalean izan zen Paul Ojuel, Iñigo Ugalde oiartzuarrarekin batera. Ezin izan zuen lana borobildu, eta galdu egin zuten, Axier Arteaga eta Ander Imazen kontra, 14-22. Baina dagoeneko jokatu du final bat Hernanik, sasoia hasi berritan.
Gaur, beste bi finaletan
Oiartzungoa, ez da udako azken finala izango. Gaur bertan, beste bi finaletan izango dira hernaniarrak. Burladako torneo garrantzitsuan, elkarren kontra ariko dira Paul Ojuel eta Ioritz Arrieta: Josu Linzoainekin (Huarte) Ojuel, eta Ibai Arratibelekin (Aurrera Saiaz) Arrieta. Ikuskizun bikaina eskainiko dute bi hernaniarrek, aurreko koadroetan. 19:00etan hasiko dira partiduak.
Zarautzen, berriz, Iñaki Esnal eta Eneko Aizpitarte ariko dira finalean, Zaporra torneoan. Erasti eta Landa usurbildarrak izango dituzte aurkari, azken hiru urteotako irabazleak. Ezustekoa ematen saiatuko dira hernaniarrak, 18:30etan hasita.