Festen leloa zorrotz betetzeko, 24 orduz ez ixiltzeko alegia, laguntza ederra ematen du Ikastolako tabernak. Urtero paratzen dute, aspalditik, Goizuetako Plazan, eta egun eta gau dago zabalik. Aurten, ostegunean irekiko ditu lehiatilak, arratsaldeko 19:00etan, eta ez ditu berriz itxiko, fiestak bukatu arte.
Lau eragile elkartzen dira, ixten ez den taberna antolatzeko: Umore Ona elkartea, Gurasoen Elkartea, Gazte Asanblada eta Etxera. «Talde polita osatzen dugu laurok», dio Miren Terese Uitzik, antolatzaileetako batek: «gogotik egiten dugu lan, eta uztailean hasten gara dena prestatzen».
«Gehiena, otorduak»
Denetatik ematen dute tabernan, edozein ordutan joanda ere: bokatak, edariak, kafeak... «Baina gehiena, otorduak ematen ditugu», dio Uitzik. Berataratzen denak, xolomoa, hirugiharra, tortilla eta txistorra beroak izanen ditu aukeran.
«Ia herri guztiak hartzen du parte, baita kanpokoek ere»
250 pertsona egoten dira lanean, festen bost egunetan. «Eromena izaten da, turnoak antolatzea», azaldu du Uitzik. Lau orduko txandak egiten dituzte, eta 17 pertsona ere egoten dira, lan gehien dagoenean: 11:00etatik 15:00etara, eta 19:00etatik 23:00etara. «Ia herri guztiak hartzen du parte tabernan, eta kanpoko jendea ere egoten da lanean».
Fuerteak izaten dira asteburuko goizak ere: «entzierroa tokatzen denean, jende asko biltzen da tabernan». Gauetan, berriz, ez da horrenbeste jende izaten, Uitziren arabera: «hiruretatik zazpietara izaten dira ordu tontoak, nolabait esateko».
Aurreneko aldian, haurtzaindegia ordaintzeko
Orain urte asko, haurtzaindegi zerbitzua jarri zuten Goizuetan, baina Nafarroako Gobernuak ukatu egin zien dirulaguntza. Gastu horri aurre egiteko paratu zuten, aurrenekoz, Ikastolako taberna.
Hain justu, haurtzaindegian haurrak dituzten gurasoek, taberna irekiko dute bihar, Umeen egunean, 10:00etan hasi eta gauera arte. Horrekin, urteko haurtzaindegiko kuota ordainduko dute.