Santio jaiak pasata, balorazio garaia da Astigarragan. Uztailaren 29an antolatu zuen bilera Udalak. Bertan izan ziren, baita ere, antolaketan parte hartu duten hainbat elkarte: Galtzaurko erretiratuak, Akelarre taldea, Astigar dantza taldea, Gazte Asanblada eta krosseko antolakuntza. Jaien alde onak eta txarrak bereiztu zituzten, baina oro har, «balorazio ona» egin zuten.
Bileran nabarmendu zuten, normalean arrakasta izaten duten ekitaldiek, tirada izan dutela aurten ere: Santa Ana eguneko jarduerak, Akelarrea, Astigar dantza taldearen erakustaldia, kross herrikoia...
Oro har, «balorazio ona» egin dute jaien inguruan, baina hobetu beharrekoak ere aipatu dituzte: aulki jokoa, tortilla lehiaketa...
Correfoca ikusteko, «jende asko» bildu zen
Horietaz gain, azpimarratu zuten «zenbait ekintzek izandako harrera ona». Horrela, Skasti musika taldea, haur parkeak, Gure Musikari Handiak kalejira, barrene herrikoia, idien pisatzea eta sokamuturra aipatu zituzten, batzordera agertu zirenek. Gainera, azaldu zuten «jende asko» bildu zela Diables de Vacarisses taldearen correfoca ikusteko.
Hobetzeko, zenbait kontu
Hobetu beharrekoak ere jarri zituzten mahai gainean: tortilla lehiaketan erretiratuei ezezik, edonori parte hartzen uztea; aulki jokoan bigarrenez giro txarra izan dela eta, kentzeko aukera aztertzea; bazkari herrikoian jende gutxi; taberna eta txosnen ordutegiagatik kexak...
Herritarrek ere, iritzia eman dezakete: kultur etxeko, udaletxeko eta kiroldegiko buzoietan, edo Udalaren web orriko iritzi-inkestan.
Herritarrek ere badute iritzia emateko aukera
Hala ere, bileran egindako balorazioa «ez da behin betikoa». Izan ere, herritar guztiek dute iritzia emateko aukera, irailaren 1era arte. Horretarako, buzoiak jarri dituzte kultur etxean, udaletxean eta kiroldegian, eta Udalaren web orrian ere egin daiteke: ohar interesgarrietan, Santio jaietako iritzi-inkesta beteta.