Martxan jarri du lizitazioa Gipuzkoako Foru Aldundiak, Astigarraga eta Hernani artean falta den bidegorri zatia eraikitzeko. Lanak urrian hasiko dira, eta lau hilabeteko epean bukatzea aurreikusten dute. Beraz, 2015 urte hasierarako Hernani eta Astigarraga arteko bidegorria osatuta egongo da.
Era berean, Donostia eta Urnieta arteko bidegorria behin betiko osatzeko gutxiago faltako da zati hau bukatuta. Martutene eta Loiola arteko zati batzuk egitea besterik ez da faltako.
Martindegitik Ergobiaraino, 400 metro
Hernani eta Astigarraga lotuko dituen zati honek 400 metro izango ditu luzeeran, eta 4,5 metro zabaleran, ia ibilbide osoan. Martindegi auzoko bi errotonden inguruan hasiko da zati berria, lehenagotik egina dagoen Hernaniko zatiarekin lotuta; Akarregi bailarakoarekin.
Astigarragarako norabidean jarraituko du, Sansonategi baserrirako sarbidearen paretik, eta hain juxtu, Martindegirako sarreran, bidegorria beste aldera pasako da, bertan dauden lau enpresen parera (Leiza S.L.; Mecarizti S.A.L.; Luko instalaciones y montajes; eta Bureau Baterias y Renovables S.L.). Errepidearen alde horretara pasatzeko zebrabide bat jarriko da, eta baita bidegorri berri hori dagoeneko egina dagoen zatiarekin lotzeko ere, Ergobiarako bidean. Hain zuzen, Ergobian bukatuko da zati berri hau, Oialume errekaren parean, Astigarraga eta Hernani arteko mugatik gertu.
Lanek 4 hilabete iraungo dutela aurreikusten da; 2015 urte hasierarako bukatuta izango dira.
Sansonategirako sarrera eta Martindegirako oinezko pasabidea ere berritu egingo dituzte.
Konponketa lanak, Martindegirako eta Sansonategirako bidean
Bidegorria egiteko obrak egingo direla aprobetxatuta, bide batzuk konponduko dira.
Batetik, errotondatik Martindegi auzorako dagoen oinezko bidea berritu eta egokitu egingo da.
Bestetik, Sansonategi baserrirako sarrera berrituko da. Bidegorria bertatik pasako denez, bi bideak bateragarri egingo dituzte, eta egokitu egingo dute ingurua, Sansonategirako sarrera hobetuz.
Astigarraga eta Hernani lotzeko azken fasea
Bi herriak lotzeko bidegorriaren azken fasea bukatuko da obra honekin. Dagoeneko eginak daude bidegorriaren lehenengo zatia (1-4 faseak), eta azkenekoa (7 fasea), eta oraingo lanekin 5 eta 6 faseak egingo dira.
Aurrekontua 790.675 eurokoa da, eta lanek lau hilabete iraungo dutela aurreikusten da. Beraz, lanak 2015 urte hasieran bukatuko dira.