Kontzentrazioa deitu dute gaur Donostiako Buen Pastorren, goizeko 12:30etan, herriko tabernen konfiskazioa salatzeko. Asteazkenean eman zuen sententzia Auzitegi Nazionalak, Herriko Tabernen Auzian, eta 111 lokal konfiskatzeko agindua eman du. Tartean dira Hernaniko Garin eta Astigarragako Zipotza tabernak.
Hernaniko beste bi lokal ere egon daitezke konfiskazio aginduaren barruan: Antxista kultur elkartea eta Jarki taberna zena. Erabakia ezagutu bezain laster, kontzentrazioa egin zuten Garinen.
Juanpe Plaza hernaniarra, absolbituta
Lokalak konfiskatzeko aginduarekin batera, Auzitegiak kartzela zigorra ezarri die 20 inputaturi. Horien artean ez dago Juanpe Plaza hernaniarra; absolbitu egin du Auzitegi Nazionalak, beste 13 auzipeturekin batera.
ETAren parte izatea edo kolaboratzea egotzi die kondenatuei, «fronte instituzionala» osatzea. Herriko tabernek, berriz, ETAren egitura finantzatzen dutela arrazoitu du.
Epaia ez da irmoa oraindik, eta defentsak asmoa du erabakiaren aurka helegitea jartzeko. «Astakeria juridikoa» dela adierazi dute.