«Kendu det gainetik, prebietako maldizioa, eta baita presioa ere», azaldu zion Endika Barrenetxeak Kronikari, partidua bukatu berritan. 30-25 irabazi zion Etxabe IIri, Buruz Buruko txapelketaren azken prebian. Horrela, torneoko final zortzirenak jokatzeko sailkatu da, eta Uterga izango du kontrarioa. «Berak izango du presioa orain, ez nik», dio.
Berdinduta hasi zen partidua. Etxabe II hasi zen aurretik, baina Barrenetxeak zabaldu zuen lehenengo tartea, 7-3. Berehala berdindu zen partidua, ordea, eta parekatuta egon ziren. Harik eta Etxabe II aldageletara joan zen arte, 13-15 zirela, ezker eskuan mina zuelako. Minak ez zion kalterik eragin, baina gelditzeak partidutik atera zuen erabat.
«Jokutik kanpo zegoen, eta fisikoki oso larri»
Orduan etorri zen Barrenetxearen onena: defentsan bikain aritu zen, eta sakearekin egin zion min. Tartea zabalduz joan zen, eta Etxabe jokutik kanpo zegoela, Barrenetxearen sake faltek soilik mantendu zuten partiduan. 26-21 jarri eta bideratuta zirudienean, hurbildu egin zen aurrelaria, 26-25, baina beranduegi zen. Bide zuzena egin zuen Barrenetxeak, 30era arte.
«Ez det ondo jokatu, ez ditut nire armak atera; baina fisikoki sendoago nago, eta horri esker irabazi det». Psikologikoki egin zion min Barrenetxeak, «sakez tantoak eginez, eta oso pelota zailak eramanez, frontoian zulorik ez zegoela sinestaraziz».