Lau egunez festa eta parranda nahiko egin ostean, iritsi da atseden hartzeko garaia. Santio jaiak igandean agurtu ziren eta irudi ederrak utzi dituzte. Irudi guztiak eta bideoak interneten daude ikusgai: www.kronika.net. Udalak ere hainbat bideo jarri ditu www.vimeo.com helbidean: Akelarrea, Soka-dantza eta Santa Ana eguna.
Santa Ana egun ederra
Besteak beste, azpimarratzekoa da Santa Ana egunez izan zen giroa. Jendetza bildu zen Foruen plazan, idi dema, bertsolari, sagardo probaketa eta herri kirolekin gozatzera. Deman, lehia estua izan zen eta Oreretako Matxainen idi pareak irabazi zuen, 60 plaza eginda. Bigarren Bermeoko Alegria izan zen 59 plaza, 4 zinta eta 1 metrorekin. Hirugarrena, berriz, Ezkio-Itsasoko Zubillaga “Igeldo” 56 plaza eta 2 zintarekin.
Aldarrikapenerako tartea ere izan zen eta epaiketa politikoen aurka, kontzentrazioa egin zen. Julen Zuaznabar eta Breogan Fernandezen aurka irailean hasiko diren epaiketak bertan behera uzteko eskatu zuten eta Ekaitz Ezkerra askatzeko. Ostiralean, presoak gogoan izan zituzten hilabetero bezala.
Argazki lehiaketa
Santioen inguruko argazki lehiaketa antolatu du Gazte Asanbladak eta parte hartzeko igandera arte bilduko dituzte argazkiak: astiarrako.gazteasanblada@gmail.com.
Festa gehiago
Orain, abuztuan, Santiomendi auzoko, San Roke eguneko eta Ergobiko festak izango dira.