Gaur erabakiko du, Udaleko plenoak, Kardaberaz kaleari Andrekale deituko zaion. Guztira, 12 puntu landuko dira plenoan, tartean Palestinaren aldeko mozio bat. 19:00etan hasiko da, pleno aretoan.
5. puntuan eztabaidatu eta erabakiko da egun Kardaberaz kalea denaren izena. Urtarrilean jarri zen gaia mahai gainean, Hernaniko kale eta plazetan berdintasun proposamenaren barruan. Ekainak 17ko plenoan gaia azaldu ondoren, gaur erabakiko da izen aldaketa egiten den.
Horri lotuta, Goiz Eguzkiko parkeari Kardaberaz izena jartzea ere bozkatuko da plenoan, jarraian. Aurreko puntua onartzen bada, Kardaberaz izena Goiz Eguzkiko parkeak hartuko du, puntu hau ere onartuz gero.
Kardaberaz kalea Andrekale deituko da, eta Goiz Eguzkiko parkea Kardaberaz, plenoak bi puntuak onartuz gero
Ordezkari aldaketak eta garbiketa kontratua luzatu
Gainontzeko puntuen artean, proposatuko da Behemendi eta Aiako Harria Parke Naturaleko udal ordezkariak aldatzea. Horrela, Begoña Zuzak hartuko luke Asier San Emeterioren tokia. Eta gaur bozkatuko da, baita ere, udal eraikinen garbiketa-kontratua berritzea. Urtebetez luzatzea proposatu da, garbiketa ordu gehiago eginez Laubidieta ikastetxean eta Udal Jolas igerilekuetan, eta horrela, kostua haundituz.
Palestinaren aldeko mozioa
Mozio bat ere aurkeztuko da, salatuz Israelek Gazako lerroan ezarritako zigor kolektiboa, eta biharko kontzentraziora joateko dei eginez, Plaza Berrin 20:00etan.