Ekainean, normalean, behera egiten du langabetu kopuruak, eta aurten ere horixe gertatu da. 1.311 langabeturekin bukatu da hilabetea Hernanin, 46.044rekin, Gipuzkoan, eta 167.762rekin EAEn.
Kontratazio kopurua igotzeari esker jaitsi da langabezia tasa. Azken hiruhilekoan kontratu gehiago egin dira; gehienak, aldi baterakoak, baina mugagabe kopuruak ere gora egin du. Zerbitzuen sektorean egin dira kontratazio gehien. Gizonezko gehiago kontratatu da emakumezkoak baino, eta emakumezko gehiago dago paroan Hernanin. Hala ere, biztanleriaren erdia baino gehiago da emakumezkoa; Eustateko 2013ko datuen arabera, Hernanin 19.757 biztanle daude; horietatik 9.728 dira gizonezkoak, eta 10.029 emakumezkoak.
Aste Santuan hasitako beheranzko joerak, jarraipena
Urtarrilean eta otsailean gora egin zuen langabetu kopuruak Hernanin, eta baita martxora bitartean ere. Baina apirilean behera egin zuen, eta Aste Santutik aurrera ere behera egin du hilero: apirilean 1.424 ziren langabetuak; maiatzean 1.391; eta ekainean, 1.311.
Emakumeak eta helduak, gehienak
Langabetuen artean, gehiago dira emakumezkoak, eta 45 urtetik gorakoak, denak. Apirilean, 717 emakume zeuden langabezian, 45 urtetik gorakoak, eta 707 gizon, 25 eta 44 urte artekoak.
Maiatzean, emakume langabetuak 711 ziren, 45 urtetik gorakoak, eta gizonak, 680, 45 urtetik gorakoak, baita ere.
Ekainean, berriz, 683 emakume erregistratu dira paroan, 45 urtetik gorakoak, eta 628 gizon, 25 eta 44 urte artekoak.
Zerbitzuen sektorean mugimendu haundiena
Datuak sektoreka banatuz gero, zerbitzuenean nabari da, hilabetez hilabete, mugimendu gehien, eta joera bera da beti.
Zerbitzuen sektorean dago langabetu gehien. Ekainean, 822. Industrian, 208; eraikuntzan, 138; eta nekazaritzan, 33.
Baina kontratazioei dagokienean ere, zerbitzuen sektorean egin dira gehien: 373, hain zuzen. Industrian, berriz, 151 egin dira; eraikuntzan 26, eta nekazaritzan, bat bera ere ez.
Kontratazio motari dagokionez, sektore guztiak kontuan hartuta, aldi baterakoak dira gehientsuenak. Hala ere, mugagabeek goranzko joera hartu dute apiriletik hona. Apirilean, 20 gizoni eta 17 emakumeri egin zitzaien kontratu mugagabea. Maiatzean, 12 gizoni, eta 16 emakumeri. Eta ekainean, 13 gizoni eta 17 emakumeri.
Datuak hobeak, lehengo urtearekin konparatuta
Urtarriletik ekainera bitarteko datuak hobeak izan dira aurten, lehengo urtean baino, hilero, eta joera ere hobexeagoa izan da. Hau da, 2013an, urtarriletik otsailera igo egin zen langabetu kopurua, martxoan zertxobait jaitsi eta apirilean eta maiatzean berriro igo. Ekainean, behera egin zuen, baina irailera bitartean, gora. Aurten, urtarriletik martxora bitartean egin du gora langabetu kopuruak, eta ordutik hona, behera.
Zifrak, nabarmen hobeak dira aurten. Hilero hilero lehengo urtean baino langabetu gutxiago izan da, eta ekaina bukatzean, lehengo urtean baino 122 langabetu gutxiago erregistratu da.