Hernaniko pelotariak lanez lepo eta txukun baino txukunago ari dira.
Gaur bertan, IV Buruntzaldeako finalerdietako beste bi partidu jokatuko dira, 18:00etan, kiroldegian: kadeteetan, Aranbarri-Aranguren, Aristi-Zenekortaren kontra; eta seniorretan, Esnal-Aizpitarte, Galarraga-Mujikaren kontra.
Bestalde, lehengo larunbatean bukatu zen Hernaniko 4/5ko Txapelketa. Infantiletan, 18-5 irabazi zion Garikoitz Arizmendik Ohian Zugastiri, aise. Kadeteetan, berriz, Xabat Pagola izan zen garaile, 22-10, Ander Lazkanoren aurka. Hiru astez min hartuta egon bada ere, garaipen erosoa lortu zuen Pagolak. Azkenik, seniorretan, Iñigo Urkizuk irabazi zion Josu Altunari, 22-14, nahiko partidu berdinduan.
Azkenik, maila ezinhobea dutela erakutsi dute azken egun hauetan Ioritz Arrietak, Paul Ojuelek, Aitor Gorrotxategik eta Eneko Aizpitartek, hainbat txapelketatako finaletan lan bikaina eginda.
Arrieta, Europako txapeldun
Ioritz Arrieta Bartzelonan izan da Europako Txapelketan, Arkaitz Peñas nafarrarekin. 10 tantotako 2 joko jokatzen dira, eta irabazi egin zieten iparraldeko bikoteari (10-2 eta 10-1) eta finalean, Huarteko bikoteari (10-3 eta 10-4). Horrela, Europako txapeldun eta Espainiako azpitxapeldun izaten bukatu du denboraldia Arrietak.
Irailean Mexikon jokatuko den munduko txapelketarako ere deitu dute Arrieta, baina ezin izango du joan, ikasketak direla medio.
Ojuel, Gorrotxategi eta Aizpitarte, bi finaletan
Bestalde, Paul Ojuel bi finaletan aritu da. Alegiako Txapelketan Tabar nafarrarekin jokatuta irabazi zuen finala, 22-10, Urretabizkaia eta Gorrotxategi hernaniarraren kontra, ia batere lehiarik gabe. Añorgan, berriz, Jolas Etxea Txapelketako finala galdu egin zuen Ojuelek elite mailan, Aitor Diazekin jokatuta, Urbieta II eta Perezen aurka (22-15).
Aizpitartek ere jokatu zuen txapelketa honetan, promesa mailan, Ugalde oiartzuarrarekin; galdu egin zuten, 22-20, Arteaga-Erasunen aurka.