Herriko artistek egin ohi dituzten produktuekin, Artisau Azoka antolatzen dute Aranon Santiotan, eta aurten ere halaxe eginen da. Bihar bertan izanen da azoka, 19:00etatik aurrera.
Beste hainbaten artean, Pino Vicedo zeramikariak jarriko du postua. Orokortuz, zeramikaria dela dio Vicedok, baina beste hainbat lan ere egin ohi ditu: kristalean grabatuak, koadroak margotu... «Sortzea gustatzen zait», dio. Eta bere etxeko tailerrera joatea besterik ez dago daukan talentuaz jabetzeko.
Bere postuan, denetik izanen da: buztinezko bitxiak, lanparak, lorontziak, gazteluak, dekoratzeko piezak, koadroak, grabatutako kopak, kamixetak… «Batzuk iazko gauzak izanen dira, baina aldatzea ere gustatzen zait, eta aurten kristalean egindako grabatuak jarriko ditut. Umeentzako kamixetak ere egin ditut. Horrez gain, Euskal Mitologiako pertsonaiak lantzen hasi naiz eta oraingoz Tartalo egin dut». Bestalde, grabatuen artean, kopa haundietan eta txupito basoetan egindako lanak dauzka, besteak beste. El Señor de los Anilloseko pertsonaiak egin ditu horietako batzuetan. Eta irudiei laguntzeko, elfikoan idatzitako esaldiak: «Internetez ikasi nuen elfikoan idazten. Bai, friki bat naiz!», dio parrez.
Azokan, giro ederra
Vicedo Donostian jaio zen eta 22 urte daramatza Aranon bizitzen. Herrian bizi denetik, ia urtero hartu izan duela parte azokan azaldu du. «Orain dela 18 urte edo hartuko nuen parte lehenengo aldiz, eta ordutik, azoka egin ez zen urteren bat kenduta, beti hartu izan dut parte». Sortzen den giroa asko gustatzen zaiola dio: «Aranon jendea oso ongi portatzen da. Mugimendua izaten da eta erosi ere egiten du jendeak. Janaria jartzen da, tortilla lehiaketa eta sagardo dastaketa ere antolatzen da azokarekin batera, eta horrek jendea erakartzen du. Oso ongi antolatzen dela iruditzen zait. Horrez gain, azoka honetan, bertakook hartzen dugu parte. Oso lokala da eta oso ideia polita. Asko gustatzen zait».
Biologiatik, zeramikara
Zeramika eta artea, Vicedoren ogibidea da. Diseinatzaile grafikoa ere bada. «Orain dela 23 urte, Biologia ikasten ari nintzen eta laugarren urtea egiten ari nintzela utzi egin nuen. Izan ere, zeramika ikastaro batera apuntatu nintzen, Hernanin, eta ikastaro hartan konturatu nintzen hau zela benetan egin nahi nuena, odolean neramala. Handik, Debako Arte eta Ofizio eskolan hasi nintzen. Bi urteko ikasketak egin nituen. Zeramikaz gain, egurra eta harria tailatzen ikasi nuen, brontzea urtzen... Hasieran, Bilbora joaten nintzen goizetan, eta arratsaldetan Debara, baina utzi egin nuen. Dirua ere behar nuen eta diseinatzaile grafiko moduan aritu nintzen lanean. Amaran egiten nuen lan, bideo jokoetarako egiten nituen diseinu grafikoak», azaldu du.
Hernaniko ikastaro hori egin aurretik, inoiz ez omen zuen zeramika lanik egin eta interesik ere ez omen zuen izan.
«Zeramika ikastaro batera apuntatu nintzen Hernanin, eta konturatu nintzen hau zela benetan nahi nuena, odolean neramala»
Garai bateko eran
Zeramika lanak garai bateko eran egiten ditu Vicedok. «Normalean, ez ditut tornuarekin egiten lanak. Oso gutxi erabiltzen dut. Alfareroek erabiltzen dituzte, batez ere, tornuak. Nik garai bateko eran egiten ditut, txurroen teknika erabilita edo plaken teknikarekin».
Pieza bat egiteko zenbat denbora behar izaten duen galdetuta, piezaren araberakoa dela azaldu du. «Lorontzi txiki bat egiten, adibidez, bost minutu behar ditut. Hori, forma ematen, baina lehortzeko, labean sartzen baduzu, egun oso bat behar duzu. Eta beste pieza askotan, barrua hustu egin behar izaten da. Izan ere, lehortzean buztina puztu egiten da eta lehertzeko arriskua dago. Orduan, pieza pixka bat lehortzen denean, erdibitu egiten da eta barruko buztina kendu egiten zaio. Gero berriz pegatu egiten da».
Autodidakta eta multifazetikoa
Vicedo autodidakta da, gainerako teknika eta eskulan guztiak bere kaxa joan da ikasten: «Dena, probatuz egiten dut. Esmalteen ikastaroa bakarrik egin dut. Nire kaxa hasi nintzen, baina ez nintzen ongi moldatzen eta ikastaroa egitea erabaki nuen, Gironan». Lanak ere zuzenean egiten ditu; ez ditu aurretik inon marrazten. Eta zeramikaz gain, beste hainbat gauza ere egiten ditu; eta gehiago eginen lituzke: «Gauza pila bat egin eta ikasiko nituzke, baina egunak ez ditu hainbeste ordu! Esaten dute hobe dela gauza bat ongi egitea, gauza asko erdizka egitea baino. Baina ni horrelakoa naiz».
Eskolan saioak ere eman izan ditu, kaligrafiazkoak. Hain zuzen, lumarekin nola idatzi erakusten aritua da. Eta buztina eta tornuarekin ere bai. Bestalde, festetan, umeei berak pintatuko dizkie aurpegiak.
Azoketan ibilia
Lehen, erdi aroko azoka guztietara joaten zela dio Vicedok, baina alabak jaiotzearekin utzi egin zuen. «Pixka bat gehiago koxkortzean berriz hasiko naiz. Hala ere, orain, inguruko azoka batzuetara ere joaten naiz: Arano, Goizueta, Leitza, Herrerara...».
Feriatara joaten zen garaian, 10-12 orduz aritzen zela lanean gogoratzen du. «Orduan, 200-300 euro irabazten nituen hilabetean, eta orain deus ez. Krisiak sekulako eragina izan du. Badakit ezin dela hemendik bizi, baina gustatu egiten zait. Azokaz azoka ibiltzea ere izugarri gustatzen zait. Oso interesgarria da, giro ederra izaten da, jende pila ezagutzen duzu...».