Goizuetarrek gimnasioa dute ekainetik. 20 bat makinarekin osatu dute, Asinko pabiloian. Izaskun Bakero zinegotziak azaldu duenez, Bilboko gimnasio bat kendu behar zutela eta, sortu zen aukera: «baiezkoa eman genuen, eta lekua bilatzea izan zen ondorengo pausoa. Eskola parean dagoen Asinko pabiloia egokia zela iruditu zitzaigun. Pabiloi ttikiko materiala handira pasa genuen, eta hortxe paratu dugu».
Oinarrizko aparatuak
Gimnasioan oinarrizko makinak paratu dituzte, 20 inguru: muskulatzeko tresnak, oinarrizko bizikletak... Dutxarik ez dagoela azaldu dute, momentuz, nolako erantzuna duen ikusi nahi baitute: «jendeak erabiltzen duela ikusten badugu, orduan helduko dira hobekuntzak».
«Erantzuna ona ari da izaten»
Pozik daude herritarren erantzunarekin. Bazkide sistemarekin funtzionatuko du gimnasioak, eta momentuz 30 bat lagunek eman dute izena: «guk funtzionatzea nahi dugu, herritarrak bazkide egitea. Bazkide asko egiten badira, horrek esan nahi du erabilera emanen zaiola».
Urteko kuota eta gimnasioa erabiltzeko zenbait arau paratu dituzte: «25 euro ordaindu behar dituzte, zerbait sinbolikoa dela uste dugu. Prezio eskuragarria dela uste dugu. Arau batzuk ere paratu ditugu, baina oinarrizkoak. Zentzu pixka batekin ibiltzea nahi dugu. Ongi zaintzen badugu, denentzako onuragarria izanen da».
Gimnasioko bazkide direnek giltza bat izanen dute, eta ordutegirik gabe, nahi dutenean erabili ahal izanen dute.
Herritarren laguntza, eskertzekoa
Prozesu osoan herritarren eta bereziki gazteek emandako laguntza azpimarratu nahi du Bakerok: «gazteek lan asko egin dute. Udalak materiala paratu du, baina beraiek aritu dira lanean, guztia txukundu eta prestatzen. Makinen funtzionamendua erakusten ere, bi bolondres ari dira: Egoitz Zubiri eta Jon Zabaleta».