Ekonomia Gardena kanpaina jarri du martxan Gipuzkoako Foru Aldundiak, eta horren barruan, lehenengo bi ekimenak abiatu ditu, herritarrak kontzientziatzeko eta ekonomia gardena eratzeko.
Lehenengo kanpainaren helburua izango da, herritarrak kontzientziatzea faktura eskatzearen garrantziaz: «faktura eskatzea da salerosketak zirkuitu beltzetik ateratzeko bide eraginkorrena», dio Helena Francok, Ogasun eta Finantza Diputatuak.
Diru beltzik gabeko gizartea
Kanpainaren asmoa da, ezkutuko ekonomiarik eta diru beltzik gabeko gizartea lortzeko pausoak ematea. Izan ere, «denontzako lehen mailako zerbitzuak izatea» galarazten dute, ezkutuko ekonomiak eta diru beltzak.
Enpresariak eta Ogasuna, zuzeneko loturan
Bigarren ekimena Terminal Fiskala da. Fakturaren beharrarekin du lotura honek ere, eta enpresari eta profesionalei zuzenduta dago. Asmoa da sistema bat martxan jartzea, profesionalek, komertzioek eta enpresariek lotura zuzena izateko Ogasunarekin. Horrela, gizartearen aurrean «erabateko zerga gardentasuna» bermatuko dute, establezimendu edo enpresa horiek.
Sistema hori, programa informatiko bat da, eta transakzio guztiak erregistratu eta Ogasunari komunikatzen dizkio. Gainera, programak berak sortzen du faktura.
Momentuz, borondatezkoa izango da proiektuan parte hartzea. Uztailean, proiektu piloto bat jarri da martxan, eta 50 taxilarik hartu dute parte.