Txapela janzteko atarian geratu zen Endika Barrenetxea, San Fermin torneoko finalean. Utergarekin batera, partidu estua jokatu zuten, Etxeberria IV eta Ionen kontra, baina amore eman behar izan zuten. Azkenean, 35-40 nagusitu zen bikote azpeitiarra.
Hasieran, aurretik
Ikusgarria izan zen finala, erritmo bizikoa. Hasieran, aldea hartu zuten Utergak eta Barrenetxeak, eta 10-4 jarri ziren. Baina errekuperatzea lortu zuten Etxeberria IV eta Ionek, eta 18-18 berdindu ondoren, aurretik jarri ziren. Lau-bost tantoren aldearekin izan ziren ordutik, bukaerara arte.
Ion, aurkari gogorra
Finalean, erronka zaila zuen Barrenetxeak, torneoko onena izan baita Ion atzelaria. Hernaniarrak ezin izan zuen dominatu, eta azpeitiarrak markatu zuen diferentzia. Gainera, oso ondo ezagutzen dira elkar Aritz Etxeberria eta Ion, eta finalean nabaritu zen hori. Utergak, bere aldetik, ohi baino gutxiago arriskatu zuen, finalaren presioagatik.
Ligaxkako hiru partiduak irabazi ondoren, San Ferminetako txapelarik gabe geratu da Barrenetxea.