Bertso Eskolako kide guztiak elkartzeko aitzakia perfektua bilatu dute: Bertso Olinpiadak. Urteak pasatzen joan dira, eta lehen koadrila haundi bat zena, distantziatzen joan da, umeak eta bestelako eboluzioak medio. Harremana berreskuratu eta estutze aldera, zita jarri dute gaur Ereñotzun. Bertso Olinpiadak jokatuko dituzte bi koadrilen artean: batetik guraso direnak, eta bestetik, oraindik pausu hori eman ez dutenak. Ereñotzu leku aproposa iruditzen zaiela diote: «umeekin joan, proba diferenteak egin, eta jendea gutxiago molestatuko dugula uste dugu».
Zortzi proba, aurretik
Kirola eta bertsoa uztartuko ditu Bertso Olinpiadak. Aurreneko proba 10:30etan dute: Hernani-Iñatzu krossa. Segidan, erreleboa emango diote bizikleta klasikari: Iñatzu-Kaxeta-Iñatzu. 12:30etan Pala txapelketa jokatuko dute. Eta eguerdian, bazkaltzeko aitzakiarekin, paella eder bat egingo dute. Arratsaldean izango du segida olinpiadak: bertso saioa, mus txapelketa, haur jolasak eta ohore banaketa antolatu dituzte. Proba guztiek, helburu bera izango dute: bertso eskolako gazte eta ez hain gazteak elkarrengandik gertu sentitzea.