EZ ohiko irteera antolatu dugu Mendiriz Mendi elkartean, uztailean. Normalean, irteerak Euskal Herrian edo Pirineo inguruan egiten ditugu. Oraingo honetan ordea urrutira goaz, Leonera. Santiago eguna dela aprobetxatu eta lau eguneko asteburu luzea aitzaki hartuko dugu, Bierzo eskualdea ezagutzeko. Leon probintziako eskualdea bada ere, askok diote Galiziako bosgarren probintzia dela.
Meategi ikusgarrira, bisita
Horren adibidea da bisitatuko dugun Las Medulas meategia. Ponferrada hiriburutik hego mendebaldera dagoen meategi erraldoi hau, Erromatar Inperioaren garaian zeru irekian egindako urre meategi handiena izan zen. Historiagile batzuk diote garai hartan penintsulako eskualde babestuena Bierzoko zati txiki hori zela.
Bertan burututako ingeniaritza lana izugarria izan zen eta paisaiaren eraldaketa izugarria ekarri zuen. Meategia 250 urtetan ustiatu zen eta 500 milioi metro kubo lur mugitu zirela kalkulatzen da (Hernaniko harrobian baino 100 aldiz gehiago). Hamar eta hogei mila langile inguru aritzen zirela uste da.
Gaur egun paisai bitxia dago, gaztainondoz eta haritzez osatutakoa. Las Medulas inguruneak hiru izendapen ditu: Parke Kulturala, Monumentu Naturala eta Unescoren gizon emakume guztien ondarea.
Bigarren egunean Ancares mendizerran barrena egingo dugu buelta. Ancares ingurune menditsua da eta oso gaizki komunikatuta egon da ia 20garren mende bukaerara arte. Mendizerra bi mugen artean dago kokatuta: Leon eta Lugo. Mendiak ez dira oso malkartsuak, goi mendiko begetazioan belardiak eta txilardegiak dira nagusi; lasaitasuna eta paisai ederrak ditu.
Larunbatean Leon probintziako mendi ezagunenetako bat egingo dugu: Catoute.
Irteeraren deskribapena
Goizeko 06:00etan abiatuko gara, uztailaren 31n. Hamaiketakoa egiteko geratuko garenez, Las Medulas parkera ordu biak aldera iristeko gara. Tartetxo bat emango da jendeak bazkaltzeko aukera izan dezan; ondoren, hiru orduko ibilbidea egingo da bertako paisaia eta mea-zuloak ezagutzeko. Bidea desnibel txikikoa eta erraza da. Elkartzen den jendearen arabera aukera izango da ere bertan dagoen kobazulo bat bisitatzeko (ordaindu beharreko bisita da). Egunari amaiera emateko, autobusa hartu eta Carracedo del Monasterio herrira joango gara, bertan izango baitugu lau egunetarako kanpo basea.
Hurrengo egunean, goizean goiz esnatu eta gosaldu ondoren, autobusa hartu eta bi orduko bidaia izango dugu, Ancares mendatera (1.670 m) iritsi arte. Asmoa da, Ancares krestaren zati handi bat egitea. Lehendabizi Pico Cuiña (1.992 m) mendia igoko da. Hirurehun metroko desnibela jaitsi, eta lepo batera iritsiko gara. Bertatik hasita igoko dugu Pico Penalonga (1.890 m). Hurrengo lepora (1.700 m) jaitsi ondoren, Pico Mustallar mendia (1.935) igoko dugu. Hemendik Burbia herrira (900 m) jaitsiko gara. Bertan jasoko gaitu autobusak, kanpo basera itzultzeko. Ibilbidearen desnibel metatua 800 m gora eta 1.500 m behera izango dira. Iraupena zazpi ordu ingurukoa; irteera polita da.
Irteera uztailaren 31tik abuztuaren 3ra antolatu dute. Izen ematea, astelehenetik.
Larunbatean goiz abiatu eta autobusean Igüeña herrira hurbilduko gara; eta handik Espainiko izen luzeena duen herrira: Colinas del Campo de Martin Moro Toledano. Ordu eta erdi inguruko bidai izango da. Gistredo mendizerran kokatuta dagoen Pico Catoute mendia (2.1.17 m) igoko dugu. Mendi hau Leon probintziako mendi altuenetakoa da, eta baita ezagunetarikoa ere. Ez du zailtasun berezirik; bakarra, malda gogorrak eta egin beharreko desnibela, 1.000 m gora eta beste horrenbeste behera. Ibilbide zirkularra izango da. Beraz igo eta jaitsi leku desberdinetatik egingo da.
Azkeneko egunean, itzuli aurretik, Leon hiriburuan bazkaltzeko asmoa dago. Beraz turismo apurra egiteko aukera ere egongo da.