Laugarrenez irabazi du Aiko-Maikok, Euskal Herriko kamiseta onenaren saria, Ondarroan ospatzen den Zapato Azule jaian. «Esaldiek egiten dituzte berezi gure kamisetak», aitortzen dute. Irudiak ez ezik, abestiak, olerkiak edo hitz-jokoak jartzen dizkiete: «testua duen irudia politagoa da».
Zapato Azule jaian, urtero egiten dute Euskal Herriko Kamiseta Azoka, eta bertan izan dira, hutsik egin gabe, Ainhoa Lujanbio eta Aitzol Goikoetxea, Aiko-Maikoren sortzaileak, 2006an lehenengoz parte hartu zutenetik. Ordutik, bederatzi ediziotan, lautan izan da beraiena kamisetarik onena.
Azokan, «giro ederra»
Egun horretan, jai polita izaten da Ondarroan, Goikoetxearen ustez: «kamiseten inguruan tradizio haundia dago han, eta giro ederra sortzen da. Egun horretan, herritarrek ohitura dute kamisetak erostera joateko». Ekainaren 28an izan da aurten, eta 27 parte hartzaile izan ziren Kamiseta Azokan: 11 ondarrutarrak, eta beste 16 Euskal Herri osokoak.
Parte hartzaileek eurek erabakitzen dute, urtero, zeinena den kamisetarik onena. Horregatik, Lujanbiok eta Goikoetxeak asko eskertzen dute, gainontzeko diseinatzaileek beraien lana baloratzea: «poza ematen du gainontzeko egileen kontsiderazioak».
Mota guztietako estanpazioak dituzte Aiko-Maikoren kamisetek: irudiak, marrazkiak, olerkiak, abestiak, esaldiak...
Aurreneko kamisetak, eskuz eta garaje batean
Garaje batean hasi ziren kamisetak egiten, 2004an. Serigrafia ikasi zuen Lujanbiok eta diseinu grafikoa Goikoetxeak, eta bazuten arlo horretan zerbait egiteko gogoa: «hasieran eskuz margotzen genituen kamisetak», dio Goikoetxeak, «baina ez zen errentagarria».
Hobby modura aritzen ziren garai hartan, baina kamiseta eske hurbiltzen zirenek, jarraitzera animatzen zituzten. Horregatik aurkeztu ziren Ondarroako azokara, 2006an. Eta horixe izan zen, hain justu, apustu indartsuagoa egitera eraman zituena: «kamiseta asko saldu genituen azokan, eta denda irekitzea erabaki genuen».
Mota guztietako diseinuak
Beraiek diseinatutako kamisetak dauzkate salgai, Aiko-Maiko dendan. Mota guztietako estanpazioak dituzte kamisetek: irudiak, marrazkiak, abestiak, olerkiak, hitz-jokoak... «Bigarren irakurketa bat duten esaldiak jartzen ditugu». Maite dut zalantza esaldia erabiltzen dute asko. Zalantzan egotea baita, hain justu, aiko-maiko egotea: «dena zalantzan jartzen dugun pertsonak gara biok. Bizitzan gauzak zalantzan jartzea komeni da».
Orain, urtean bi denboraldi diseinatzen dituzte: negukoa eta udakoa. Kamiseta asko saldu dituzte urte hauetan, sasoi bakoitzeko 300 inguru. Erosleak, berriz, adin guztietakoak: «hasieran, gazteetan zentratu ginen, baina konturatu ginen helduek ere interes haundia zutela».