Miguel Olloren oroimenezko proba jokatu zen San Joanetan. 46garren edizioa zuen, karabina tiroketako txapelketak, eta gaztetxo askok hartu zuten parte. Horien artean, 24 sailkatu ziren finalerako, eta guztietan onena Silvia Lasa izan zen.
San Joan jaien aurreko egunetan jokatu ziren sailkapen probak. Bi multzotan aritu ziren parte hartzaileak: 13 urtera artekoak batetik, eta 14-16 urte bitartekoak bestetik. Lehen multzoan, 20 sailkatu ziren finalerako, eta bigarrenean 4 tiratzaile.
Lasak, 78 puntu finalean
Saio bikaina egin zuen Silvia Lasak finalean, eta bi tiraden artean, 78 puntu lortu zituen. Bera izan zen onena, 13 urtera arteko gaztetxoetan. Bigarren Asier Iztueta izan zen, 72 punturekin, eta hirugarren Unai Heras, 57 puntu lortuta.
Beste multzoan, berriz, Urko Bereziartua sailkatu zen lehenengo, Lasak baino puntu bat gutxiago lortuta: 77 puntu. Beraz, Lasak jantzi zuen txapela, kategoria guztietan berak lortu baitzuen puntu gehien.
Eskopeta bat, zozketan
Finalean bertan, aire konprimituko eskopeta bat zozketatu zuten, parte hartzaile guztien artean. Idoia Urruzuno izan zen saritua.