Joan den astean, Eusko Jaurlaritzako Hezkuntza sailak jakinarazi zuen, Udalak eskatutako diru laguntza emango zuela Astigarragako Herri Eskola haunditzeko. 1go faserako izango da. Udalak prentsaurrekoa eman zuen ostegunean eta oso pozik daudela azaldu zuten Andoni Gartzia alkateak eta Maite Olatziregi alkateorde eta Hezkuntza zinegotziak, «urteetako aldarrikapenari erantzuna emango diogulako». Udalak aurreproiektu bat egina du, baina orain behin betiko proiektua zehaztuko du eta lehenbailehen hasiko dira lanekin. Urrian bertan hasiko direla aurreikusten dute. Asmoa da, urtebeteko lana izatea, hau da, 2015-2016 ikasturterako martxan izatea.
Dena dela, aurrelan batzuk egitea beharrezkoa ikusten dute eraikitzen hasi aurretik eta lan horiek udara honetan egingo dira, eskolako erabiltzaileei ahalik eta eragozpen txikiena sortzeko. Txikien jolastokiko estalkia kenduko dute, lurrak mugitu... Ahalik eta eragozpen gutxien sortzen ahaleginduko direla azpimarratu dute eta pazientziarekin hartzeko eskatu diete herritarrei.
Gobernu taldearen lehentasuna
Alkateak azaldu zuen, Astigarraga osoaren urteetako aldarrikapena izan dela Ikastola duin baten beharra eta gobernu talde honen lehentasuna izan dela legegintzaldi hasieratik: «oinarrizko zerbitzu eta azpiegiturak defendatzea eta kalitatezkoak izatea delako gure helburua», dio. «Legealdi honetan, Udalak, Hezkuntza sailarekin batera, 1.500.000 euro inbertitu ditu Ikastolan, aurreko legealdian baino 1.000.000 euro gehiago», gaineratu zuen.
Aurreproiektuaren arabera, denera, 897.000 euroko kostua izango dute lanek. 1go faseko kostua, 506.850 eurokoa izango da. Jaurlaritzak 304.100 euro emango ditu (%60) eta Udalak 202.740 euro jarriko du. Bigarren fasea 390.150 euro izango da eta 2015eko aurrekontuan sartuko du Udalak.
Alkateak, oposizioaren «babes eza» ere salatu zuen: «Inprobisatzen ari ginela esateaz gain, aurtengo aurrekontuetako Ikastolaren partida kritikatu zuten, gure eskumena ez zela esanaz. Hala ere, azken momentuan babesa eman dute eta hobe berandu, inoiz ez baino».
31 gela denera
Eraikin berria, eraikin zaharrari pegatuta egingo da, txikien jolastokian. Bi pisu izango ditu, eta besteak beste: 6 ikasgela berri (orain artekoak baino haundixeagoak), Lehen Hezkuntzako ikasleen jangela (kiroldegiko jangela bertara eramango da, kiroldegian espazio berri bat utziz), erabilera anitzeko gela bat (antzerkirako, dantzarako, laborategia...), komunak eta estalitako jolasgune berri bat. Eraikin honek, herriaren behar batzuei ere erantzungo diela nabarmendu zuten, erabilera anitzeko gela eta estalitako gune berria herritarrei irekiak izango baitira, besteak beste.
6 gela berriekin, Astigarragako eskolak 31 gela izango ditu. Egungo premiei erantzungo diela azaldu zuten: «2014/15 ikasturtean, 543 haur daude matrikulatuta Astigarragako eskolan. Haur Hezkuntzan hasiko diren haurrak 69 izango direnez, eta datozen urteetako aurreikuspenak ildo beretik doazenez, derrigorrezkoa da maila guztietan 3garren lerroa izatea, hau da, 3 gela. Eskari horri modu egokian erantzungo diogu orain».
Institutua, erronka
DBHrako institutua lortzea da orain Udalaren erronka. Lurra erreserbatuta dago eta Aldundiaren onarpenaren zain daude.