Bi urte eskas daramatza Joseba Esnaola berrobitarrak, harriak jasotzen. Afizioa txikitatik zuen arren, kasualitatez hasi zen. Ordutik, geldiezina izan da bere ibilbidea: 200 kiloko harria jaso zuen iaz, eta 215eko marka jarri du orain gutxi. 20 urterekin, erakustaldi asko eginak ditu honezkero. Martindegiko festetan du zita oraingoan: bihar 12:00etan, Izeta IIrekin.
Nolako saioa egingo duzue?
Lehenengo, bakoitza bere harriekin ariko gara. Nik 180 kiloko errektangularra eta 140 kiloko zilindrikoa eramango ditut. Eta aizkolarien ondoren, antolatzaileek jarritako harriak jasoko ditugu.
Nola sortu zitzaizun harrijasotzearen afizioa?
Txikitan banuen pixka bat, beti gustatu zait. Baina kasualitatez probatu nuen. Behin Azpeitiara joan ginen, eta harrijasotzaile baten entrenamendua ikusten, probatzera animatu ninduten. Dena den, banuen gogoa, aurretik ere.
«Harrijasotzaile guztietatik dago zer ikasi, eta nola egiten duten ikustea beti dago ondo, nahiz eta bakoitzak teknika propioa dugun».
Nola entrenatzen duzu?
Bi entrenamendu egiten ditut astean, harriekin: asteazkenetan eta larunbatetan. Momentuz, gimnasiorik eta horrelakorik ez dut egiten.
Baduzu erreferenterik, harrijasotzaileen artean?
Bat esatekotan, Aimar Irigoien. Probatzen duzunean konturatzen zara, zeinen zaila den egiten duena. Ikaragarria da. Baina guztietatik dago zer ikasi, eta nola egiten duten ikustea beti dago ondo, nahiz eta bakoitzak teknika propioa dugun.
215 kilokoa jaso zenuen orain gutxi. Baduzu beste saiakera haundirik buruan?
Bai, orain 220 kiloko harriarekin egingo dut saiakera, Alegiko festetan. Entrenamenduetan ondo atera da, eta uste dut halaxe joango dela saioan ere. Baina egun horretakoak balio du, eta ez dago aurrez jakiterik.
Noraino iritsi zaitezke?
Ahal dudan gorena iristen saiatuko naiz. Oraindik ez dut markarik buruan, baina 215 kilo altxatzera iritsita, kontua serio hartu beharra dago.
«220 kiloko harria jasotzen egingo dut hurrengo saiakera, Alegiko festetan; entrenamenduetan ondo atera da, baina egunekoak balio du».
Ibarran egin zenuen debuta, orain bi urte. Gogoan duzu saio hura?
Urduri nengoen, eta aurretik harriekin gutxi ibilita. Orain baino askoz ere gutxiago nekien orduan. Baina lehen saioa beti da berezia. Gainera, herrikoak ere joan ziren ikustera. Ordutik 30 bat saio egin ditut.
Harri haundiekin aritzen zara. Zergatik?
Ikusi genuen haundiekin nahiko ondo moldatzen nintzela, eta hortik jotzea erabaki genuen. Harri haundiak jasotzeko, bularra ez da hainbeste landu behar, eta kilo gehiago izatea ez da kaltetan izaten.