Ondo pasatzeko egunak dira hauek, Martindegi auzoan. San Fermin jaietan bete-betean sartuta, ekintzaz jositako asteburua izango dute. Atzo hasi ziren festak, ohiko kalejirarekin. Ondoren, buruhaundiak eta ipuin kontalaria izan ziren txikientzat, eta tortilla eta sagardo dastaketak helduentzat. Aurreneko eguna modurik onenean bukatzeko, erromeria izan zuten, Izer ta Alabier-ekin.
Lau eguneko festa antolatu dute aurten. Beraz, astelehenera arte, ekintzaz betetako egitaraua izango da, aspertzeko tarterik gabe. Goizean goiz ekingo diote gaur, kalejira eginez auzoan zehar. Lo kuluxka bati tartea egin ondoren, 11:00etan ekingo diote berriz: auzoko baserrietan zehar, Mobida egingo dute, trikitixaz lagunduta.
Eguerdi partean, 13:00etan, gure artean ez daudenei oroigarri xume bat eskainiko diete, Goiko Aristian, eta Tturko familiari eskertza egingo diote.
Auzo bazkariaren ondoren, haurren txanda
Indarrak berritzeko, auzo bazkaria egingo dute. Bertan bazkaldu nahi duenak, aurrez erosi behar ditu txartelak, Oialume tabernan. Otordu goxo batez gozatu ondoren, haurrek hartuko dute protagonismoa. Gaztelu puzgarria izango dute 16:00etan, eta zezentxo eta zalditxoekin jarraituko dute dibertsioa, 18:00etan.
Gaua iristen denean, urteroko zita izango dute Abere Demarekin. Elkarren kontra ariko diren zaldiak, honakoak: Hernaniko Zerainenak, eta Ortzaikako Imanol Etxeberriarenak. Festa ez da hor amaituko, ordea. Gorputza mugitzeko aukera izango dute gauerdian, Laiotz taldearekin dantzan. Eta dantza egiteari ez uzteko, platano dantza lehiaketa xelebrea egingo dute, goizaldean.
Herri kirolak eta bertsolariak
Lasaiago hasiko dute eguna, bihar goizean. Bermuta hartzeko egin dute zita, goizeko 11:00etan, eta herri kirolez gozatzeko aukera izango dute ondoren. Oihan Larretxea eta Ruben Saralegi aizkolariak ariko dira elkarren kontra. Harriak jasotzen, berriz, Izeta II haundia eta Joseba Esnaola gaztea.
Jarraian, bertsolariek hartuko dute hitza. Andoni Egañak eta Amets Arzallusek, txaloka eta algaraka jarriko dituzte ikusleak, 13:00etan.
Bazkalostean, berriz, gazteek jasoko dituzte ikusleen txaloak, XVIII. Trikitilari Gaztetxoen Txapelketan. Ondoren, Toka Txapelketa Nagusia jokatuko da, eta tiradak amaitzean, bigarren hitzordua dute Egañak eta Arzallusek, goizean hasitako saioari amaiera emateko. Eta kantuaren ostean, dantza berriro. Bide batez taldearekin, dantzaldia izango dute.
San Fermin egunean, haurrak protagonista
Astelehenean, San Fermin egunean, meza izango da, auzoko hildakoen alde. Ondoren, hamaiketakoa egingo dute, Oialume tabernan. Eta hortik aurrera, haurrek hartuko dute protagonismoa, egun osorako. Haur jolasak izango dituzte goizean, eta arratsaldean, marrazten ariko dira. Tiro karabina lehiaketa ere izango da, 17:00etan. Ondoren, Patxin eta Potxin pailazoen emanaldiaz gozatuko dute txikienek, eta saioa amaitzean, kalejira egingo dute, jaiak ixteko.
EGITARAUA
Uztailak 5, larunbata
07:00, Kalejira auzoan zehar.
08:00, Lo kuluxka.
11:00, Auzoko baserrietan zehar Mobida trikitixaz alaituta.
13:00, Goiko Aristian oroigarri xume bat `gure artean ez
daudenei´. Tturko familiari eskertza, emandako harreragatik.
14:30, Auzo bazkaria. *Txartelak aurrez, Oialume tabernan salgai.
16:00, Gaztelu puzgarriak.
18:00, Zezentxoak eta
zalditxoak.
23:00, XIII. Abere Dema. Hernaniko Zerain eta Ortzaikako Imanol Etxeberriaren zaldien artean.
00:00, Dantzaldia Laiotz
taldearekin.
Goizaldera, Platano dantza
lehiaketa.
Uztailak 6, igandea
11:00, Bermuta.
12:00, Euskal Festa:
- Aizkolariak: Oihan Larretxea eta Ruben Saralegiren arteko lehia.
- Harrijasotzaileak: Izeta II eta Joseba Esnaola.
13:00, Bertsolarien saio berezia. Andoni Egaña eta Amets Arzallus.
17:30, XVIII. Trikitilari Gaztetxoen Txapelketa.
18:00-19:00, Toka Txapelketa Nagusia (Gurutzeta Sukaldeak antolatua).
19:00, Bertsolarien bigarren saioa: Egaña eta Arzallus.
20:00, Dantzaldia Bide
batez taldearekin.
Uztailak 7, astelehena
10:30, Auzoko hildakoen alde Meza (ondoren hamaiketakoa, Oialume tabernaren eskutik).
Jarraian, Haur jolasak.
17:00, Denak marraztera.
17:00, XLV. Tiro karabina lehiaketa.
18:00, Patxin eta Potxin pailazoen emanaldia.
Ondoren, Kalejira.