Ume eta gazte koadrilek hartuko dituzte herriko kaleak, uztailean. Goizero 539 neska-mutil elkartuko dira, adinaren araberako taldeetan banatuta, udaz disfrutatzeko gogoz. Txikienek, 4-10 urte bitartekoek, gaur dute udaleku irekietako aurreneko hitzordua. Gaztetxoak berriz, datorren astelehenean hasiko dira kirol udalekuetan. Ekitaldiz betetako egitaraua dute aurretik guztiek, uztailaren 25a bitartean.
Umeak, gaurtik
Atsegindegi eta Tiloseta ingurutik abiatuko dira gaur, aurreneko eguna duten 440 neska-mutilak. Txikienek, 2010-2009 urtekoak Atsegindegin dute elkargunea; 2008-2007 urtekoek Biterin; 2006-2005 urtekoek Tilosetan, Urumea parean; eta azkenik, 2004 urtekoek, Tilosetako frontoiaren aldamenean. Udaleku irekiak goizez izango dira, 09:30etatik 13:00etara.
Umeen udalekuetan jolasak eta irteerak dira protagonista: tailerrak, jokoak, irteerak... Gaztetxoen udalekuetan kirola da nagusi: errugbya, eskalada, atletismoa...
Ur festa, San Ferminak eta Azken festa, tradizioa
Aurkezpenerako eguna izango dute gaurkoa. Ikastolatik edo joan den urtetik ezagutzen direnak izango dira tartean, baina asko berriak ere bai! Handik aurrera, ekintzez betetako egunak izango dituzte aurretik: igerilekura irteera, tailerrak, jokoak... Ohi bezala, udaleku irekietako egun klabeak hiru izango dira: San Fermin eguna uztailaren 7an, Ur festa uztailaren 18an, eta Azken festa, hilaren 25ean.
99 gaztetxo, astelehenetik
Kirola izango da gaztetxoen udalekuetako ardatza. Bost taldetan banatuta, egunean kirol bat praktikatzeko aukera izango dute. Astelehenean dute aurreneko zita: Kiroldegiko frontoiko eskaileretan elkartuko dira egunero, 09:15etan.
Udalekuetan praktikatuko dituzten kirolen artean daude: atletismoa, herri kirolak, errugbya, eskalada, piraguismoa... Kirol batzuetarako begirale adituak eta laguntzaileak izango dituzte. Antolatzaileeek gomendatu dute, egun bakoitzeko programazioa aurrez begiratzea, arropa egokia eramateko.