Astigarragako Herri Eskola aitzindarietako bat da .eus domeinua izaten. 92 eragilek egin dute bat ekimenarekin eta larunbatean aurkeztu zuten.
Azaldu dutenez, oraindik Arantzazuko Ama Ikastola izena baldin badu ere, pixkanaka martxa hartzen ari dira datorren ikasturtean dena prest izateko. «Datorren ikasturtean, Astigarragan gure eskola propioa izango dugu: Astigarragako Herri Eskola. Banaketa prozesu honekin batera, denbora berean, Euskal Herrian beste prozesu bat gertatzen ari da: .eus domeinua aurkeztu dute eta laster erabilgarri egongo da. Ekimen honek euskal kultura agerian utzi nahi du interneten, euskal komunitateak leku propio bat izatea sarean. Gure eskolaren izaera euskalduna da eta gure helburuen artean daude euskeraren eta euskal kulturaren transmisioa, garapena eta sustatzea. Guretzat berri pozgarria izan da .eus domeinuaren sorrerarekin bat etortzea. Izan ere, gure webgunearen domeinua .eus izatea aukera ezin hobea da hasiera-hasieratik gure balore hauek agerian uzteko».
Hemendik aurrera www.arantzazukoama.org helbidea Martutenekoa izango da eta Astigarragakoa, www.astieskola.eus.