Urumeako bizilagunek beti izan dute kezka, euri jasa haundietan eta uholdeetan Añarbek zenbat ur askatzen ote duen. Horri erantzun nahian, Añarbeko mankomunitateak lau bideo kamara jarri ditu presari begira, eta irudiak momentuan ikusi daitezke Añarbeko web orrialdearen bidez: www.añarbe.es.
Herritarren susmoak eta beldurrak
Uholde kasuetan Añarbek maniobra bat baino gehiago egin behar izaten ditu, momentu batzuetan urari eusteko, eta beste batzuetan askatzeko. Ez da oraingoxea herritarrek susmoak eta beldurrak izatea, hori behar bezala egiten ote den edo ez. Lau bideo kamara horiek momentuero erakusten dute presa nola ari diren kudeatzen: zein ate dauden irekita eta zein itxita.
Bost bidetatik askatu dezake ura Añarbeko presak: kaudal ekologikoa (beti irekita dago, errekara ur kantitate minimo bat askatzeko), ezkerreko eta eskubiko ateak, Howell balbulak, eta goiko ataka.