Añarbeko urtegiak hamar herriri ematen die ura, eta gero eta ur gutxiago behar dute herri horiek. Zergatik? Hiru arrazoirengatik. Batetik, bidean ur gutxiago galtzen delako, hartarako egindako obrei esker. Bestetik, etxean ditugun labadora, garbigailu eta abarrek asko hobetu dutelako, eta ur gutxiago behar dutelako. Eta azkenik, kontsumo industriala asko jaitsi eta hobetu delako.
Emaitzak edozein harrituta utziko luke, 1995ean 40 miloi litro kubiko ur behar zituzten hamar herri horiek, eta iaz 24 miloi behar izan zituzten; 17,5 miloi m3 gutxiago, alegia, %40 pasatxo.
Albiste on horrek buruhauste bat ere sortu dio, dena dela, mankomunitateari: faktura ere jaitsi egin dela. Alegia, herriek kontsumitzen duten litroko ordaintzen dutenez, mankomunitateak diru gutxiago dauka orain azpiegiturak hobetu, eta eguneroko funtzionamendurako.
Donostiak eta Errenteriak urtebetean behar dutena
18 urtean jaitsi den kopurua jaitsita, Añarbek Donostia eta Errenteria adinako beste bi herriri eman ahal izango lioke ura. Añarbeko Mankomunitatea osatzen duten hamar herrien artean (Donostia, Errenteria, Hernani, Lasarte-Oria, Pasaia, Oiartzun, Urnieta, Lezo, Usurbil eta Astigarraga) Donostia eta Errenteria dira, ur gehien kontsumitzen dutenak: urtean 17,5 miloi m3, bien artean.
2008a eta 2009a oso urte onak izan dira, %8 eta %7 jaitsi zelako kontsumoa. Bi urte horietan, batez ere, Añarbeko ur sarea hobetzea antzeman da
Saltorik haundiena, 2007tik 2008ra
Herritarrak eta administrazioak pixkanaka kontzientzia hartzen ari dira ur kontsumoa zaindu egin behar dela, eta alor guztietan erreparatu zaio horri. 1995tik, urtez urte kontsumoak behera egin du (1996an 2 miloi m3, 1997an 1,8 miloi...), 1999an eta 2000 urtean izan ezik. Bi urte horietan 0,9 eta 0,7 miloi m3 gehiago kontsumitu ziren. 2001a oso ona izan zen, 2,7 miloi m3 ur gutxiago behar izan zelako, eta 2008a eta 2009a ere bai, %8 eta %7 jaitsi zelako kontsumoa, urtean 2 miloi m3 gutxiago, alegia.
Bi urte horietan, batez ere, Añarbeko ur sarea hobetu izana antzeman da. Datozen urteetan ere kontsumoak behera egingo duela uste du Añarbek, eta 2014rako aurreikuspena 23,5 miloi m3 uretan jarri du; 1995ean 41 miloi ziren.
Inbertsioetarako diru gutxiago; uraren prezioak gora?
Mankomunitateko hamar herriek diru gutxiago ordaintzen diote orain mankomunitateari, gutxiago kontsumitzen dutelako. Eta hori albiste ona izan arren, badu alderdi bihurria ere. Alegia, orain, Añarbek diru gutxiago dauka inbertsioak egiteko, eta mantenimendurako. Mankomunitateak adierazi duenez, erremedio bat izan daiteke uraren prezioa igotzea. Dena dela, hori hobeto aztertu eta ausnartu beharreko puntutzat jo dute.