Plenoa izan zen ostegunean Aranon eta mozio bat onartu zen bertan, Hipotekak eragindako plataformak aurkeztua: Etxebizitzarik gabeko jenderik ez, jenderik gabeko etxebizitzarik ez.
Hori horrela, Alokairuko Etxebizitza Parke Publikoa abian jartzeko eskatzen dio Aranoko Udalak Nafarroako Gobernuari. Etxe hauek izanen lirateke etxebizitzatik kaleratu dituzten familientzako, etxebizitza ordainean emana dutenentzako edo antzeko beste negozio juridikoren baten menpe daudenentzako eta baita etxebizitza bat errentan hartzeko diru-sarrera nahikorik ez dutenentzako ere. «Nafarroako Gobernuari eskatzen diogu, etxebizitzak erosteko inbertsio publikoa bultzatu beharrean, Etxebizitza Sozialen Parke Publikoa osatu eta indartzeko», azaldu zuten.
Etxebizitza Sozialen Parke Publiko horren araudia garatzeko ere eskatu diote gobernuari. Eskatutako hainbat neurri, hauexek: familiaren diru-sarreren araberako alokairua ezartzea; beti ere, errenta horrek ez luke behartuko inor eguneko 6 euro baino gutxiagorekin bizitzera. Horrez gain, eskatzaileen ahalmen ekonomikoa frogatzeko eskatzen den dokumentazioa, eskaera egin aurreko hiru hilabeteetako diru-sarrerei dagokiena izatea. Eskatzen den berme ekonomikoa hilabete bateko errenta baino handiagoa ez izatea. Eta Hiri-errentamenduen Legeak hobesten duen moduan, etxejabeak ordaintzea Ondasun Higiezinen gaineko Zerga (OHZ).