Garraio Hiriaren inguruan prentsa oharra bidali du EAJ-PNV alderdiak Kronikara. Halaxe dio: «Hilabetetan isilik egon ondoren, Bilduko Gobernu Taldeak baieztatu berri du Astigarragako Garraio Hiria babesten duela. Ezker abertzalea posizionatu egin da azkenean, proiektu honi dagokionean. Oposizioan zegoenean kritikatu egin zuen. Momentu gutxian, 180 graduko bira eman dute. Zenbat aldatzen diren gauzak ezker abertzalearentzat gobernatzea tokatzen zaionean!».
Legegintzaldiaren hasieratik, EAJko zinegotziek askotan galdetu izan diotela gaiaren inguruan diote: «Erantzuna, ordea, beti bera zen: Diputazioa proiektua aztertzen ari zela. Alkateak eta bere taldeak ez dute posizionatu nahi izan proiektu honen aurrean. Eta agintera iritsi aurretik gogor kritikatu zuten».
Larunbatean argitaratutako albistearen inguruan sorpresa adierazi dute: «Zalantzaz betetako hilabeteen ostean, sekulako sorpresa hartu genuen pasa den larunbatean, Astigarragako Bilduk Garraio Hiria babesten zuela irakurri genuenean prentsan. Oposizioko taldeei bere iritziaren berri emateko ohiko prozedura jarraitu beharrean, alkateak erabaki zuen herriko medio bati elkarrizketa ematea, esateko, Garraio Hiria herrian jartzearen alde zegoela. “Gipuzkoarentzat onuragarria bada, Astigarragarentzat ere onuragarria izango da” esan zuen. Eta proiektuak herriarentzat izango dituen abantailak azaldu zituen: aparkaleku haundi bat, gasolindegi bat, ostalaritza zerbitzuak... “Garrantzitsua da lur hauek Astigarragaren esku jarraitzea onurak herriarentzat izateko. Gasolindegia oso errentagarria izango da”, gaineratu zuen», azaldu du EAJk.
2012an ENBA sindikatuak egindako salaketarekin bat datorrela dio EAJk: «Sindikatu honek kritikatu zuen Bilduren inkoherentzia Garraio Hiriaren kokalekua Agroaldearentzat izateko exijitu zuelako oposizioan zegoenean, eta kontrakoa esateagatik, Astigarragako udaletxera iristean».
«Dirudienez, Bildu proiektuaren errentagarritasunaz konturatu da. Hori bai, ez du egiten ikuspegi lokal batetik. Bere jarrera aldaketa justifikatzen saiatzen da esanaz, Garraio Hiria Gipuzkoarentzat onuragarria izango dela. Gezurra. Partidismo purua. Hori da arrazoi bakarra. Adibide bat gehiago Bilduren hipokresiarena», gaineratu du.