Gaur bukatuko dira San Joan jaiak, 00:00etan, Bandera Jaitsierarekin, baina horrez gain, protagonista asko izango ditu egunak. Herri kirolen eguna izaten da ekainaren 27a, eta gaur ikusmina piztuko dute bai idi-demek eta bai ondorengo aizkora apustuak. Joxe Mari Olasagasti beteranoa bi apustu haundi irabazita dator, ligako lehendabiziko jardunaldira. Aurrean promesa gazte bat izango du, Ander Erasun labaiendarra, iazko 23 urtez azpiko Urrezko Aizkora irabazi zuena.
‘Hernanik 1.000 urte’
Arratsaldean, pottokak eta zezen txikiak Latsunbeko plaza beteko dute, baina kaleak beteko dituena, San Joan Konpartsa, Hernani 1.000 urte atzera eramango duena. Hori, 18:30etan izango da.
Pako Zabaletak eta Javi Ormazabalek, azkeneko bizkarrekoak
Pako Zabaletak eta Javi Ormazabalek atzo eman zituzten azkeneko bizkarrekoak Axeri Dantzan, ia 30na urtean sokari helduta ibili eta gero. Agur hunkigarria egin zieten Axeri Dantzako kideek bizkarrak ederki berotu ostean azken dantzan korroaren erdira aterata. Hemendik aurrera maxkuriari iheska ibili beharko dute Axeri Dantzan...