Topa egiteko eguna iritsi da; topa, lagunengatik, koadrilagatik, festagatik eta giro eta umore onagatik. Koadrilen eguna da gaurkoa, eta azken urteetako ohiturari eutsiz, koadrilen arteko brindisa egingo da gaur, eguerdiko 13:00ean Plazan. Aurtengoan, Hernaniko Gazte Olinpiadak omenduko dira.
Bi hilabete lagunartea sendotzen
Apirilean hasi ziren Olinpiadak Hernanin, Aste Santuko oporren ondoren. Bi hilabetetan zehar hamaika proba egin dituzte herri osoan zehar, beti helburu nagusi batekin: koadrilen arteko harremanak sendotzea.
Horixe da arrazoia, hain zuzen, gaurkoan topa Olinpiaden alde egiteko. Eta bide batez, lan horretan segi dezaten gonbitea ere luzatuko zaie herriko gazteei, hemendik hainbat urtetara helduen olinpiadak egitera iritsi arte!
Topa nola egingo duten ez dute argitu, baina seguru sorpresaren bat edo beste egongo dela. Umore ona, behintzat, ez da faltako, eta eguna alaituko duten mila koloretako blusa eta kamixetak ere ez!
Mundu guztia gonbidatuta dago gaur, koadrilan festez gozatzera.