San Joan eguna izan zen atzo; egun haundia. Bertan, musikak hartu zuen protagonismoa, goiz, arratsalde eta gau. Goizeko 09:00etan txistulariak eta Banda atera ziren, Mendirik Mendi martxa ezaguna jotzen. Ondoren, Axeri Dantza Gaztea atera zen, maxkurien hotsak kaxkoan zabaltzera. Segidan, Santa Barbara elkarteko haurren danborren burrunbak hartu zituen kaleak, eta eguerditik aurrera, txistularien kontzertua lehenengo, eta Bandarena gero, izan ziren.
Estreinaldiak eta agurra
Musika Bandak kontzertu berezia eman zuen atzo. Batetik, Roberto Pacheco zuzendariaren lehenengo San Joan kontzertua izan zen. Bestetik, Imanol Kamioren Katebegiak obra estreinatu zuten. Eta gainera, Urumea ikastolaren 50garren ospatzeko, Urumea ikastola biribilketa ere estreinatu zuten; Joxe Mari Oiartzabalek konposatua, Jose Luis Urdangarinen bertsoekin, eta Ainara Ortega kantariak eta Urumea ikastolako haurrek kantatu eta dantzatua. Era berean, eskerrak eman zizkioten Maritxu Mariezkurrenari, Urumea ikastolako lehenengo zuzendariari.
Bestalde, Bandak modu berezian agurtu zuen Canario; 25 urtez Bandan jotzen aritu ondoren, hemendik aurrera ikusleen aldean jartzea erabaki baitu.
Arratsaldean ere musikak tokia izaten jarraitu zuen. Izan ere, dantza-suelto txapelketa izan zen Plazan; repentista eta bertsolarien emanaldia, Biterin; eta aerorunba iluntzean Urbieta kalean. Umeentzako pailazoen emanaldiak ere jarri zuen kolorea atzokoan, eta Eskubaloia Kalean Txapelketako haurren kategoriako finalak jokatu ziren.
San Joanak, bete-betean
Gaurkoan, berriz, bete-betean sartuko gara festa giroan. Goizean goiz, ‘Hernani’ Musika Eskolako dultzaineroek diana joko dute, eta ondoren, aurtengo San Joan jaietako lehenengo sokamuturra eta Axeri Dantza izango dira. Hortik aurrera, txarangek eta koadrilek festa giroa zabalduko dute.
Eguerdiko 13:00ean koadrilen arteko brindisa egingo da Plazan, eta aurtengoan, Hernaniko Olinpiadak omenduko dira bertan.
Ondoren, lagunartean bazkaltzeko tartea izango da. Bestalde, txarangek girotuko dituzte kaleak: Santa Barbara txarangak goizeko 11:00etan, eta Betikoak txarangak, 19:00etan. Gaueko ordu txikietan, berriz, Incansables ibiliko da.
Haurrek ere, festa
Gaurkoan, adin guztietako hernaniarrentzako egitaraua prestatu da. Haurrek parkea eta txutxu trena izango dituzte Atsegindegin, goizeko 10:00etatik aurrera. Bestalde, goizeko 09:00etan, haur kategoriako XXIV. ibai-arrantza txapelketa jokatuko da. Eguerdiko 12:00etan, berriz, erraldoi eta buruhaundiak aterako dira Plazatik.
Arratsaldean, Poxpolo eta konpainiaren emanaldia izango da haurrentzat, 16:30etan Atsegindegin, eta 17:30etan, pottokak eta zezen txikiak, Latsunbeko kirol pistan.
Ilunzean, musika berriro
Iluntzeko 19:45etan Fermin Valencia abeslariak kantatuko du Urbieta kalean; Molotoffeko txosnan ere emanaldiak izango dira 22:00etan; 22:30etan dantza saioa Urbietan; eta 23:00etan disko festa, Atsegindegin.