Bigarren urtez txosna jarri du Dobera-Kronikak, San Joan jaietan. Aurten gainera, nobedade batekin: afariak ere emango ditu. Urte luzez otorduak eman diren leku berean dago txosna, Tilosetako kioskoaren aldamenean. Bi turno izango dira txosnan: afariak 20:00etatik gauerdira bitartean emango dira; eta gosariak, ordu txikitan, 05:00etan hasita.
Multikopista, arrazoia
Joan den urtean jarri zuen Dobera-Kronikak txosna aurreneko aldiz. Kronikako aleak egunero inprimatzen dituen multikopista hondatu egin zen. Behar beharrezkoa zen erreleboa, eta 9.000 euroko kostuari aurre egitea zen helburua. Herritarren erantzuna benetan eskertzekoa izan zen, eta 2.348 euro lortu ziren.
Beharrezkoa zen diru guztia lortu ez bazen ere, multikopista ekartzea erabaki zen. Orain, ordainketak sortutako zuloari aurre egitea da helburua.
Afaltzeko, bokatak
Bokatak afaldu nahi dituzten herritarrentzat aukeretako bat izango da aurten Dobera-Kronikako txosna. Hiru bokata daude aukeran, konbinazio ezberdinekin: patata tortilla, xolomoa eta hirugiharra. Azkeneko biei gazta eta piperra eransteko aukera dago. Eta xolomoa eta hirugiharra batera jan nahi dituenak ere, eskatu besterik ez du!
Gosariak, ordu txikitako tripazorriak asetzeko
Joan den urteko harrera ona eta gero, aurten ere gosariak izango dira Dobera-Kronikako txosnan. Gazitik jan nahi duenak tortilla eta txorixo pintxoak izango ditu aukeran. Gozoa nahiago duenak, herritarrek egindako bizkotxo, madaleta, tarta eta bestelakoak... Txokolate eta kafe beroa ere, emango dira. Eta salda ere, izango da aukeran! Ordu txikietako gosariekin batera, edariak ere salduko dira txosnan.
Laguntzeko modu asko
Dobera-Kronikari laguntzeko modu bat baino gehiago daude. Txosnan turnoren bat egin nahi duenak, abisatu besterik ez du. Postreekin iaioak diren herritarren gozoak ere, ongi etorriak izango dira. Eta Dobera-Kronikako txosnan kontsumitzera gerturatzen diren herritarren langutza ere, benetan eskertzekoa izango da.