San Joan bezperako momentu berezienetakoa izaten da sua pizteko unea. Gaueko 21:30etan piztuko du Roxario Pikabea basozainak. Bertan erreko dira urteko kezka eta asmo txarrak, eta suak argituko ditu datozen egunak.
Kantaita eta aurreskua
Urtero bezala, akelarrea bukatuta piztuko da sua. Indartu bezain pronto, Kantaitako kideak aterako dira, eta suaren bueltan borobila osatuta, eguzkiari eta argiari kantatuko diote.
Jarraian, aurresku herrikoiaren txanda izango da. Suaren aurrean jarrita animatzen diren herritarrek dantzatzeko aukera izango dute, Txistulari Bandak jotako aurreskuaren erritmora. Sua itzaltzen ari denean, adoretsuenek salto egin ahal izango dute.
Udalaren gomendioak, ikusleentzako
San Joan sua dela-eta, udaletxeak hainbat gomendio egin dizkie herritarrei, segurtasuna bermatzeko.
Batetik, sutara ez ezer botatzeko eskatu dute. Bestetik, ikusleentzako eremua errespetatzea gomendatzen dute, eta ez sartzeko hesien bitartez mugatutako segurtasun eremuan. Era berean, haurren arduradunak gurasoak direla gogorarazi dute, eta beraiek direla haurren jokabideen erantzuleak.
Azkenik, sua leku publikoren batean egingo dutenei gogorarazi nahi zaie horretarako baimena behar dela. Era berean, sua egiteko arduradunak sua erre bitartean bertan egon behar duela gogorarazi dute, arauak betearazteko.