San Joan egunetik gertuen geratzen den larunbatean egin ohi dute sardin jatea Aranon eta gaurko egunez tokatu da aurten. Aurtengoa, gainera, orain arteko jendetsuena izanen dela azaldu dute. 60 bat lagun elkartuko dira. Denera, 24 kilo sardina jarriko dituzte. 20:30-21:00ak aldera egin dute hitzordua.
San Joan sutik sortua
Herriko bost lagun aritzen dira guztia antolatzen, sardinak erretzen, zerbitzatzen... Aspaldiko kontua dela azaldu diote Kronikari eta hasieran, beraiek bakarrik lagunartean egiten zutela. Orain dela 30 bat urte, beraien umeak San Joan suan saltoka ari zirela, suaren brasa sardinak erretzeko erabili zitekeela bota zuen batek katxondeoan eta halaxe hasi ziren. Umeak koxkortu zirenean, utzi egin zuten eta orain dela 10 bat urte berreskuratu zuten. Ordutik urtero egin izan da eta herriko ekintza bezala antolatzen dute; guztiei irekia.
Sua, astelehenean
Sardin jatea larunbatarekin egiten dute orain, baina San Joan sua, tokatzen denean. Astelehenean eginen dute, gainerako herrietan bezala.