Atzo iluntzean 250 partehartzaile zeuden gaurko lasterketarako izena emanda, baina antolatzaileen esanetan, «azken momentuan apuntatzen da jende gehien». Iaz, 295 korrikalari izan ziren.
Haurren artean, berriz, 200 ume inguru apuntatuta zeuden atzo, baina gaur gehiago azaltzea eta horien artean dortsalak banatzea espero dute antolatzaileek.
Haur eta gazteak lehenengo
Lasterketa 0 eta 6 urte bitarteko haurtxoek hasiko dute, 17:30etan, Urbieta kalean. 17:40etan 7-8 urtekoen txanda izango da (LH 1 eta 2 mailak), eta 17:50etan 9-10 urtekoena (LH 3 eta 4 mailak).
18:00etan gazteak hasiko dira, 11-12 urtekoak (LH 5 eta 6 mailak), eta 18:10etan 13-14 urtekoak (DBH 1 eta 2 mailak). Hauek Urbieta kalean hasiko dira, Marielutseraino. Errotondan Ave Maria aldera hartu, eta kiroldegira iritsi baino lehen eskubira egingo dute, berriro ere Urbieta kalera igotzeko eta hasierako puntura iristeko.
Urbieta kalea trafikoari itxita egongo da, anbulatoriotik aurrera, 16:30etatik 20:00etara. Gainera, zati horretan ezin izango da aparkatu egun osoan zehar.
Nagusiek, bi buelta
Helduen lasterketa 18:30etan hasiko da Urbieta kalean, eta urteroko itzulia egin beharko dute herrian barrena, bi aldiz. Urbieta kalean hasi, Izpizuatik gora hartu, Larramendi kalean behera jaitsi, Lizeagatik Atzieta kalera segi, Floridaraino jaitsi, eta buelta hasi Sagastialde Berri auzoan barrena (atletismo pista aurretik), Antziolara, Marielutsera, eta Urbieta kalera joateko. 4,5 km-tako ibilbidea bi aldiz; 9 km.
Korrikalariek txipa eta dortsala jasotzeko denbora izango dute 16:00-18:15 bitartean irteera puntuan. Lasterketa bukatuta, 19:30ak inguruan, kopa eta dominak banatu eta sariak zozketatuko dira. Ondoren, kiroldegian dutxatzeko aukera izango dute partehartzaile guztiek.
Trafikoan eragina
Lasterketak trafikoan eragina izango du, eta hainbat ohar eman dituzte.
Batetik, ezin izango da aparkatu egun osoa zehar Urbieta kalean, anbulatoriotik Marieluts auzora bitartean. Eta bestetik, zati hori trafikoari itxita egongo da 16:30etatik 20:00etara. Korrikalariak pasatzen direnean ere, errepide zatiak moztuta egongo dira ibilbidean zehar.