Astebete lehenago, San Joan jaiei aurre hartuta egin zen Udalean ekaineko Plenoa. Hamasei punturen inguruan aritu ziren; batzuk, tramiteak izan ziren. Garbitania eta Andrekaleren izendatzea datorren Plenorako atzeratu zituzten. Eta onartutako puntuen artean aipatzekoak, sei mozio izan ziren.
Andrekale izendatzea, atzeratuta
Kardaberaz kaleari Andrekale jartzeko eskaera eraman zuen Berdintasun Kontseiluak astearteko Plenora. Ez zen ordea puntua bozkatu. Astelehenean, Bozeramaile Batzordean, Hamaikabat alderdiak proposamen berri bat egin zuen: Plazatik hasi eta Plaza Berrira bitarteko zatiari jartzea Andrekale; eta handik berakoari Kardaberaz. Berdintasun Kontseiluak azaldu zuen, beraien nahia dela kale osoari aldatzea izena. Baina alderdi guztien adostasunarekin egin nahi dutela ere, azaldu zuten. Beraz, Plenoa bukatutakoan guztiak elkartzeko proposamena luzatu zuten. Hala egitea erabaki zen, eta puntua datorren Plenoan bozkatuko da.
Garbitaniako partizipazio banaketa ere, atzeratuta
Garbitania Zero Zabor enpresaren inguruko puntua ere, datorren Plenorako utzi zuten. Orain arte lau herrik osatzen zuten Garbitania, baina Oiartzun atera egin da. Hori medio, partizpazio edo akzioak berriz banatuko dituzte. Alkateak azaldu zuenez, zalantza batzuk sortu dira eta bozkaketa atzeratu egin dute.
Sei mozioak, onartuta
Plenoan azaldu ziren mozio guztiek ere, baiezkoa jaso zuten asteartean.
Hernani LOMCErik gabeko herria izatea onartu zuen Plenoak. Alderdi guztiek eman zuten aldeko botua, PSE-EEk izan ezik. Alderdi sozialistak argi utzi zuen LOMCEren kontra dagoela, baina mozioko puntu batekin ados ez zeudenez, abstenitu egin ziren.
Udaltzaingoek ere aurkeztu zuten mozio bat. Bertan eskatzen dute jubilatzeko garaian, Ertzaintzak dituen baldintza berak izatea; hau da, 60 urterekin jubilatu ahal izatea. Bilduk eta EAJk alde bozkatu zuten; eta H1! eta PSE-EE abstenitu egin ziren.
Esaitek aurkeztutako mozioaren alde agertu ziren ia guztiak; PSE-EE abstenitu egin zen. Bertan, besteak beste, eskatzen da Euskal Selekzioak ofizialki hartzea parte nazioarteko txapelketetan.
Juan Carlos Borboikoaren abdikazioaren inguruko mozioa ere, aztertu zuen Plenoak, Bilduk aurkeztua. Mozioan diote, Hernaniko Udalak benetako haustura demokratiko bat aldarrikatzen duela eta Euskal Herriak behar duela erabakitzeko eskubidea. Hamaikabat alderdiak ez zuen bozkaketan parte hartu, esanaz, Espainolen asuntoa dela. EAJk ere ez zuen parte hartu, «Espainolek bozkatzen dutena ez da gure kontua». PSE-EE abstenitu egin zen: «Hernaniko sozialistak errepublikarrak gara, baina ez dugu uste Udala denik gai hau lantzeko lekua».
Euskal kutxen etorkizuna ere izan zuten aztergai. Mozioan hil ala bizikotzat jotzen da, Araba, Gipuzkoa eta Bizkaiko tresna finantzario nagusiaren kontrol publikoa mantentzea. Bilduk alde bozkatu zuen, eta gainontzeko guztiek kontra.
Bozkatu zen azkeneko mozioan eskatzen da Haustura hidraulikoa edo frackinga etetea. Gasa bilatzeko sistema berri bati deitzen zaio hala, eta mozioan azaltzen denez, hainbat estatutan debakatu dute dagoeneko, arazoak sortu direlako: edateko uraren kutsadura, mugimendu sismikoak... Bilduk eta PSE-EEk alde bozkatu zuten; EAJ abstenitu egin zen eta H1!ek kontra botatu zuen.