Erremonte Kopa Hernaniko kiroldegian izango da bihar. Semifinaletako ligaxkaren azkeneko partidua jokatuko da, eta 19:00etan hasiko da saioa, kiroldegiko frontoian. Lehenik, esku pelotako partidu bat izango da, eta ondoren jokatuko da Erremonte Kopakoa.
Biharkoan erabakiko da nork jokatuko duen txapelketako finala. Urriza eta Agirrezabala ariko dira, Etxeberria IV eta Barrenetxea IVren kontra. Aurreneko bi jardu-naldietan, bi bikoteek galdu egin zuten Etxabe II eta San Migelen kontra. Beraz, lehenengo bikote finalista erabakita dago, eta biharkoa irabazten duena izango da bigarrena. Uztailaren 4an jokatuko da finala, Aizarnazabalen. Frontoi motzetan egin da txapelketa guztia.
Aurretik, herriko pelotariak
Biharko partidu erabakigarria girotzeko, Hernaniko senior mailako pelotariak ariko dira, eskuz binaka: Ojuel eta Azpitarte, Arrieta eta Lizeagaren kontra. 22 tantora jokatuko dute. Asmoa da pelotazale gehiago erakartzea, txapelketaren aurretik horrelako partiduak jarriz. Bihar ere, espero dute kiroldegiko frontoia betetzea.
Egitaraua
Kiroldegiko frontoian, bihar, 19:00etan
Lehenengo partidua
Eskuz binaka, 22 tantora
Ojuel-Azpitarte
Arrieta-Lizeaga
Bigarren partidua
Erremonte Kopa, 40 tantora
Urriza-Agirrezabala
Etxeberria IV-Barrenetxea IV