Aurrekontu Parte Hartzaileen azken saioa egingo da gaur. 19:00etan izango da, Udaletxeko Areto Nagusian. Bertan, herritarrek egindako proposamen guztiak aurkeztuko dituzte. Horiek baloratzeko moduak ere azaldu eta komentatuko dituzte saioan: zein irizpideren arabera aztertuko diren.
Lehenengo fasea, amaituta
Saio honekin, lehenengo faseari bukaera emango zaio. Bigarren fasean, udal langile eta teknikarien txanda izango da. Udan zehar, proposamenak aztertu eta baloratuko dituzte, aukeratutako irizpideen arabera. Horrela, zeintzuk diren bideragarriak zehaztuko dute. Horretarako, kontuan izango dira proposamenen kostu ekonomikoa, jasangarritasuna, arlo teknikoa...
Azkenik, irailean proposamenak eztabaidagai jarriko dira herritarren artean. Fase horretan erabakiko da 2015eko Udal Aurrekontuetan, zeri eskainiko zaion 500.000 euroko partida hori.
Haurtzaindegi zerbitzua
Gaurko saioan, haurtzaindegi zerbitzua izango da, bertaratu nahi duten gurasoentzat. Erraztasun hauek emanda, herritarrak hurbiltzea nahi du Udalak. Horregatik, orain arte parte hartu duten eta ez duten herritarrak gonbidatu nahi ditu azken saio honetara.